الاثنين، 20 يونيو 2011

حواديتَك




ما باملِّش من حواديتَك
ولا احس بوقت معاك

وان كنت زمان حبِّيتَك
ما عرفتش لسّه انساك

باسهر على دمعَك لِيلِي
و اسرح و انتَ بتحكيلي
موجوع و انتَ بتشكيلي

ما عْشِقْتَكْ و اترَجِّيتَك
سِبْت الـمُغْرَم بِهَوَاك

***

عيش الأيام بهدوء
ما هي كده كده.. اهي ماشية

غيَّر توب المخنوق
ما بتجيش بالعافية

اتعلَّم من قلبي
متعبِّي و بيخبِّي

ولا عمره نقص الشوق
عاشق نيِّته صافيه

***


اخترنا حياتنا خلاص
ولاّاختارت هيَّ

ما اتبدِّلشِ الإحساس
لو نِغْلَبْ مِدارِيَّه

و قلوبنا ياما فيها
حاجات بنخفيها

ما يشوفهاش غير الناس
اللامسة بحنِّيَّة


الأحد، 19 يونيو 2011

ما تزعلشي



ما تزعلشي..
و ما تلومشي..
ضميرك.. عاللي شفته في حلم
ماهوش راجع..
و مش هتشوفه ليل تاني
هتنساني..
أنا و الحلم

ما انا و انت..
و لا كنا و لا هنكون
ده شيء مجنون
ولا يعقل

و مهما يكون  بيلهمني غنا بإحساس
لكن زيك بيإلمني يا أغلى الناس

و بيك باستحمله لما بترتاحله
و باجي بقلبي وقت انت ما تسمحله

و احسّ بدمعتك عالبعد
و احسَّك و انت ناوي البعد

و اقولك.. لا ما تزعلشي..
و ما تلومشي..
ضميرك.. عاللي شفته في حلم
خلاص صدقني مش راجع
أنا هامشي !

السبت، 18 يونيو 2011

حرّ في مشاعري




بحبَّك.. حرّ في مشاعري
أقولها في سري أو شعري

تكونلي.. ولاّ ما تكونشي
يبانلي هواك و ما يبانشي
خلاص عندي ما يفرقشي

خلاص أصله.. خِلِص عُمري

***

بحبَّك.. مش مصدَّقني ؟
و من إمتى انت حسِّتني ؟
ماهي دي حكايتي في هواك

أعيش العمر مستنِّي
تحس فْـ لحظة .. تفْهَمْني
يضيع العمر كلُّه معاك

***

بحبَّك.. لسة بكياني
كإني وقفت بزماني
لأول طلَّة بعنيك !

لكِن لا خدتني أحزاني
و لا خدني حبيب تاني
ولا عندي أمل فيك

...
...

بحبَّك.. حرّ في مشاعري
أقولها في سري أو شعري

تكونلي.. ولاّ ما تكونشي
يبانلي هواك و ما يبانشي
خلاص عندي ما يفرقشي

خلاص أصله.. خِلِص عُمري


الخميس، 16 يونيو 2011

البليد



طول البعاد
بيعلم القلب الجفا
لكن البليد قلبي ما لوش غير في الوفا
صان اللي ما اتوعدشي بيه
حفظ الجميل
في الف ليل
سهره لوحده
لما قمره فجأة..
في سماه اختفى


الأربعاء، 15 يونيو 2011

عنيكي



لسه ما اتمنيتشي حد
قد ما اتمنيت عنيكي

لسه كل كلامي كدب مادام لغيرك..
و اما يِصْدَقْ اقول هزار
لسه باغزل مالحروف طول الليالي ميت نهار
و اصحى الاقي الليل مِلَيِّل..
بس غرقان نور بنار
طول ما هي غايبة عنيكي

أصلي ما اتمنبتش حد
قد ما اتمنيت عنيكي

و لسه واقف تحت شباكك بحلم حلمته بيكي
فيه في ايدي حاجة ليكي
لما شفتيها فِرِحْتي..
 بس سبتيها فـْ إيديَّه
و اللي في عنيكي محبة و ودّ مش قد اللي فيه..
بس مش عايزة الهدية..
و لازم امشي أو انت تمشي
و انسى أي حلم لسه ما اتحلمشي

واعمل إيه.. في الكلام اللي فلت و ما اتكتمشي
و بداله مين ..  الحبيب اللي على زعلك ما نامشي

طب حتى لو.. تسيبي باب نرجعله تاني
....
....
واديني من ساعتها رحت ما جيتش تاني
و الحلم متفسر كإنه من عنيكي

و لسه ما حلمتش بحد
قد ما حلمت عنيكي

و لسه لما اكتب تحسِّي عالبعاد
لسه بتميِّل عليكي نسمة من برَّه البلاد
تعرفي ان اللحظة دي..
فيها وردة الشوق فتحت لما اتسقت نقطة حنان
نقطة مالبحر اللي كان
سيبك انتِ..
و خلي بالك مالولاد
و من عنيكي
أصلي ما اشتقتش  لحد
قد ما اشتقت عنيكي


اسمك



اعذريني لما اقول اسمك كتير وسط الكلام
و كإني قاصد ألتقيه
لإني - و برغم الحَرَجْ -..
بارتاح لنطقه و لسماعه ..
و لحروفه فوق لساني باشتهيه
مع انه اسم لألف حد..
مالوش في بالي معنى يفرق عن سواه
لكني في وجوده باحسه طبطبة..
أو كف يحضن في اللقا.. 
 و ساعات غريق مستني قبلة للحياه
 من تاني ممكن تبتديه
فاعذريني لما اقول اسمك كتير وسط الكلام
لإني قاصد ألتقيه