الاثنين، 27 ديسمبر 2010

بعين اللي حبّ





باشوفك بعين اللي حبّ و حَكَم 
بتسيبي جنّة بخطو القدَم

و عِطرِك يفوحلي بِنُطْق اللسان 
و صِدْقِك في عِشْقِكْ يهزّ الكيان 
و اقولّك (ملاكي) و اقولّك كمان 

كتبتك قصيدة.. عشقتك نغم


***


في دنيانا انت كعتمة و نور 
بقلبك دهب في وسط الصخور

و لون الدهب بيغري العيون
و لا املُك غير ادعيله ربي يكون

بعيد عن دروب الدموع و الألم

***

ما تستغربيش لما ييجي الكلام 
بكل السهولة.. ما هو مش كلام

ده حِسِّك سمعته و كتبته و كان 
غنايا بصوتك.. يا صوت الكمان 

و آحس انُّ وِصْلِكْ في وشّ ابتسَمْ


الجمعة، 24 ديسمبر 2010

ما هنتيش اخونك




ما هنتيش اخونك
و لا عمري اخون
رمتني عيونك
خدتني عيون

و كان ممكن ابعد
و كان ممكن اعند
و كان سهل جنبك
اقولك بحبك
و الاقيلي راحتي
بعيد عن جنونك


***

حياتنا في لحظة بقت مستحيلة
و بدِّلنا كل الوعود الجميلة

بقت كل ثانية
حياة صعبة مرّة
لقيت واحدة تانية
لقيت نفسي برَّه


***

و من كتر صدقي في عشقي و هوايا
سألتني.. حست بحبِّك معايا

حكيت الحكاية
قالتلي انت عاشق
و ما ارضاش نهاية
تكون بيها بادىء


***

راجعلك و لكن رجوع باتفاق
يا كل المحبة .. يا آخر فراق

و وعدك لوعدي
في كف الميزان
و قبل أما تدّي
هتاخدي كمان

....
ما هنتيش اخونك
و لا عمري اخون



الثلاثاء، 21 ديسمبر 2010

من غير تجريح





كان ممكن تخلص حكايتنا من غير تجريح
و لا نسمع همس بنهايتنا و نشوف تلميح

و الحب اللي زمان جمَّعنا
يفضل في قلوبنا له معنى
مش شرط لبعض يرجَّعنا

ده كفاية عينينا تتلاقى.. و لافيش مجاريح

***

ما غصبتش قلبك و لا جيتك..
لكن حبيت و اتمنيتك..
و الــحـب اتـنـيـن

و امّا حسيتي جيت اقولِّك..
و قبلت تكونيلي و اكونلك..
قلب فْـ حبيبين

و بكلمة اتقالت من ناس
ضيعت أجمل إحساس
و نهيت الحب بتجريح

***

صدقت كلام ما سألتيش..
ان كان له أساس ولاَّ مافيش..
و اتقالك ليه

و استنيت تِهدي جرحتيني..
أسفـك بعديـها ما يكفيني..
و دموعك فيه

و بدل ما نقول شوق مين سابق
بنقول مين ساب قبل و فارق
و كلام عن بعض بتجريح

...
كان ممكن تخلص حكايتنا..
من غير تجريح


الخميس، 16 ديسمبر 2010

انا مش ملاك





أنا مش ملاك.. 
لكن معاك.. 
و كإني أول مرة احب

أنا مش ملاك..  
لكن هواك.. 
صَدَّقْنِي غِيرْ.. غِيرْ أَيّ حُبّ

علمني معنى الحب إيه..
و عرفت ليه.. 
بنخاف ساعات .. 
نِلقى هوانا ذكريات

و عرفت قَسْوِةْ الانتظار.. 
في وسط ليل خَيِّم سُكُونُه
على قلب مشتاق للنهار..  
يِلْمح حبيبه بين عُيُونه


و عرفت ليه.. مهما نداريه
اللي يحب يبان عليه

و عرفت افرَّق في الملامح
بين قلب فيه الشوق بريء
و قلب بكرة يبقى جارح
دارى خداعه بالبريق


و عرفت ليه.. لحظة فَرَحْ
تمسح سنين قلب انْجَرَحْ

و عرفت معنى الزَّقْزَقَة
فِي حْـلُوقْ عَصَافِيرِ الشُّروقْ
فَرْحِةْ هَـوَى ساعة لُـقَـا
زَيّ الهَوَا مَا وَاخِدْهَا فُوقْ

و عرفت أكتر من ده كله
مَعْنَى انْ تِلْقَى حبيب في قُرْبَكْ
من غير ما تنطق أو تقوله
حتى فـْ سكوته يكون مِجَاوْبَكْ

تِسْمَعْ فِي دَقِّةْ قَلْب مِنُّه
أو نظره في عْنِـيه غَصْب عَنُّه
 كلمة (بحبَّك)

...

أنا مش ملاك.. 
لكن معاك.. 
و كإني أول مرة احب

أنا مش ملاك..  
لكن هواك.. 
صَدَّقْنِي غِيرْ.. غِيرْ أَيّ حُبّ

الأحد، 12 ديسمبر 2010

و كان لي حلم





و كان لي حلم غير حلمك 
و كان لي طريق

و كان لي دنيا باحياها 
بقلب بريء

و حلمي كان كما الأطفال 
بـشط وفوقه قصر رمال

ما كانش فْـ بالي موج عالي 
يشد لـمـيـتـه رمالي
و اشوف الحلم قدامي 
بقايا غريق

***

و كان الحلم على قدي 
و خطوة بخطوة بيعدي

ناديت عليَّ مجروحة 
جريلك قلبي من طيبته

ما هانش عليَّ في الروحة 
و غيَّرت الطريق سبته

***

نسيت الحلم في دموعك 
و أنة جرح في ضلوعك 

أخدت الدمع فوق رمشي 
و شلت الآهة في سطوري 

و جه غيري و انا هامشي 
أتاريني انتهى دوري

الخميس، 9 ديسمبر 2010

تستاهلي





تستاهلي تلاقي حد يشيلك جوّه عنيه
تستاهلي تلاقي قلب يحبّ بكل ما فيه

و تكوني أميرة عمره .. و مالكة هواه
ما يكونلوش غيرك في الدنيادي حياه
عاشق يتمنّى يرضي فيكِ الله 

تستاهلي عشان قلبك في زمنّا نادر نلاقيه


الخميس، 2 ديسمبر 2010

نبض القلب





بنتقابل بناس تسعِد و ناس بتهِم..
ونتقابل بناس تجرح و ناس تتحب..
و ننسى الناس بكل الحلو.. كل الهم..
و تفضل ناس خدت و ياها نبض القلب

***

و تعرف إمتى ناس عاشقة بكل الروح
ساعة مالناس لوحديها لبعض تروح
و يسمع كل واحد صوت مالوهشي حروف
و تبدأ القلوب بكل سـر تـبـوح

***

و تعرف إمتى مين طيب و مين خداع
ساعة ما يجيلك الطيب بدون أوجاع
ما هانشي عليه تعيش لحظة في حزن معاه
و همه تكون سعيد في وجوده حتى وداع

***

و تعرف إمتى مين بايع و مين هيصون
ساعة ما تلاقي ناس طماعة فيك.. هتخون
و لو باقي عليك كان اصطبر عالشوق
ماهو الخاين نوى.. و النية ليها ظنون

****

و نتقابل بناس شايلة الجميل و الود
و نتقابل بناس جاحدة و عاشقة الكدب
و ننسى الناس بكل الحلو.. كل الهم..
و تفضل ناس خدت وياها نبض القلب


الخميس، 18 نوفمبر 2010

عصفور





عصفور.. و كان في إيديك..
فتحت إيدك طار

سهران بتستنّاه
يرجع لنفس الدّار ؟

زمانُه عدّى الحدود
عصفورك المفقود
بعد اللي شافُه معاك
عمر اللي راح ما يعود


***

يمكن ما راحشى بعيد
لإنه طار مجروح

لكن اللي حاسُّه أكيد
إنه طليق الروح

مهما يكون مهموم
هيقع و تاني يقوم
عمره ما كان ويّاك
وله جناح مفرود

بعد اللي شافُه معاك
عمر اللي راح ما يعود

***

قد ما بانلك ضعيف
هيعلا فوق و يطير
و سط رياح الخريف
و غيوم و ليل أعاصير

كان راضي بيك.. ما رضيت
كان راضي سجنك بيت
و امّا انجرح في هواك
حسّ بنار القيود

بعد اللي شافُه معاك
عمر اللي راح ما يعود


الخميس، 11 نوفمبر 2010

باحلم





باحلم نصلي سوا صلاة العيد 
باحلم نحج سوا لبيت الله 
باحلم نخش الجنة إيد في الإيد 
باحلم و حلمي دعوة كل صلاة 


باحلم بوشِّك كل ماجي أنام 
ألمح جبينك كل طلعة نور 
تسمع عينيكي من عينيَّ كلام 
محتار في أمرك حوّا ولاّ حور 


باحلم ببيت مش ضروري كبير 
بس فيه قلبين يوسعوا السماوات 
مليانين بالحب و السماح و الخير 
و الرضا اللي مالي كل ركن تبات 


باحلم تصوني حلم شلته معاكي 
لو زماني اتغَيَّر.. مين يدومله الحال
واحلف ما تبكي دمعة وانا ويّاكي 
تسوى إيه الدنيا جنب راحة البال 


باحلم نصلي سوا صلاة العيد 
باحلم نحج سوا لبيت الله 
باحلم نخش الجنة إيد في الإيد 
باحلم و حلمي دعوة كل صلاة


الثلاثاء، 9 نوفمبر 2010

دمع الرجال





دمع الرجال لو سال
عمره ما يبقى ضعف
فوق كتفه حمل انشال
و يشيل معاه الضعف

قوة تهد جبال
و لا ينخدش مالصخر
و يبكي مالموال
و ينجرح مالزهر


***


ما يبكيهوش الموت
ولا حبيب في غياب
حزنه تلاقيه في سكوت
مع إن ألمه عذاب

لكن بكاه تلقاه
على اللي غاب و لقاه
باقي على الأحباب


***


يضحك و قلبه حزين
و ما ينطقوش في كلام
و يخلي حزنه ما بين.. 
روحه و بين الأيام

لكن بكاه تلقاه
لما يلاقي مناه
و يحقق الأحلام


***


حاله يبكّي الحال
و صبره يوم ما يفيض
و يرضى بالأحوال
و يرضى لو هتزيد

لكن بكاه تلقاه
لحظة خشوع في صلاة
حامد لرب حميد


الاثنين، 8 نوفمبر 2010

تسمحيلي.. ؟




تسمحيلي أسأل عليكي   
لما توحشني عينيكي
لما أفتكر اللي كان    
مش احنا كان بينا زمان..
حب.. و لاّ ما كانش فيكي


***

تسمحيلي بعدك اكتب
في اللي هتحس بهوايا
قصدي أكدب.. أصلي هاكتب
فيكي أشعاري و غنايا

و اما تبقي تسمعيها   
هتعرفيني و تعرفيها
وتعرفي اني كاتبها ليكي
تسمحيلي أسأل عليكي ؟


***


تسمحيلي لما اشوفك
صدفة  لو قدر جمعنا
إوعي تداري فْــ كسوفك 
مش هاجيب سيرة وداعنا

هابقى امد إيديَّ بس
و السلام له برضه حس
كفاية إيدي بين إيديكي..
تسمحيلي أسأل عليكي ؟


***


تسمحي لمرة أخيرة
إني أحـــــــاول أفـــوَّقِــك
بكلام حروفة مش كتيرة
كلمة واحدة.. باعشقك

و إذا لسة رافضة كل شيء
قدَّري إني فيَّ شوق
و اسمحيلي أسأل عليكي
تسمحيلي أسأل عليكي ؟

الخميس، 16 سبتمبر 2010

باخاف مالتمنِّي




ساعات بابقى نفسي 
اقولِّك كلام 
و احوشه كإني 

باخاف منِّك انتِ 
و كل الحكاية 
باخاف مالتمنِّي 


***


هواكي حقيقي 
خلق من جديد 
في قلبي كتير 

و دايمًا في ضيقي 
بالاقيكي جنبي 
و قلبك كبير

لإنِّك حقيقي
هوايا الحقيقي 
و فوق ده و ده 
هوايا الأخير 


***

باحاسب عليكي 
على قد ما اقدر 
و باقدر عليَّه 

و اشوف من عينيكي 
ما بين الكسوف 
 و فرحتها بيَّه

سؤال دارى نفسُه 
و عارفُه و حاسُّه 
لأنُّه ده حِلمي 
تكوني انتِ ليَّه 


***


عشان خاطري سامحى 
هوايا ان أخدني 
بغيرته عليكي

و غيَّر ملامحي 
لإني ما صدَّقت
اني التقيكي

باحبِّك بكلِّي
و لمَّا باصلِّي
أول ما باحمِدْ 
ربي.. عليكي


***


ساعات بابقى نفسي 
اقولِّك كلام 
و احوشه كإني 

باخاف منِّك انتِ 
و كل الحكاية 
باخاف مالتمنِّي 

السبت، 11 سبتمبر 2010

حكاية قلب




قلب لا يعاتب و لا يجرح في رده
حتى لو باين في عينه حاجة منه
قلب لا يعاند و لا بيداري وده
حتى في كلامه تحس حروفه غنوا


***

قلب مخلوقله ابتسامة له لوحده
نورها يسري بين ملامح فيها صدقه
قلب كان آخر.. ما حدش تاني بعده
يتحكي فـ قصص الأحبة و اللي عشقوا 


***

قلب ما يمرِّش عليك غير مرة واحدة
قلب ما تملكش غير إنك تحبه
حب غير الحب.. غير واحد و واحدة
حتى لو كان استحالة تعيش في قربه

...
قلب تتمناله خير الدنيا كله
قد ما اتمنيت و ما قدرتش تكونله


السبت، 28 أغسطس 2010

بارتاح في وجودِك





بارتاح في وجودِك..
وانسى همومي بلمسة إيدك
و تجيني ردودِك..
حتى فْـ عِزّ زعلها حنونة

و باشوفِك جنبي..
حاسة بفرحة كإن أنا عيدِك
و بالاقي فْـ قلبي..
ميت مليون حاجة مجنونة

لحظتها باحس ان انا قادر أمسك نجمة
لحظتها فْـ عز الحب بتتولد الكلمة
لحظتها.. جروح الروح بتروح..
و ارتاح في وجودِك


***

و تحسي كتير في عينيّ بحزن لكن ساكت
و تخافي العقل يكون مشغول بحاجات فاتت

و عينيّ تيجي في عنيكي ألاقي نظرة تشيل..
لو هم سنين.. بحقيقي هواكي جميل

لحظتها باحس ان انا قادر أمسك نجمة
لحظتها فْـ عز الحب بتتولد الكلمة
لحظتها.. جروح الروح بتروح..
و ارتاح في وجودِك


***

و ساعات في حاجات.. ـ بهزار أو جد ـ بنتعاند
عِندِك بيلين.. و كإنه مِطَمِّن و مواعد

ما الاقيش في كلام الحب قد ما فِيَّ حَنين
ما الاقيش عندي و لا رد.. غير بوسة على جبين

لحظتها باحس ان انا قادر أمسك نجمة
لحظتها فْـ عز الحب بتتولد الكلمة
لحظتها.. جروح الروح بتروح..
و ارتاح في وجودِك

السبت، 21 أغسطس 2010

..و باترجّى




و لو صعب انّى اقولهالك.. 
باقولهالك و باترجّى 
تصدّي قلبي لو جالك ! 
هتلقيلِك أكيد حِجَّة 

لكن قلبِك أصدُّه ازَّاي 
و ما باصدَّق ألاقيه جايّ 
و اقول بعنيَّه واحشاني 


***

بحبِّك بس مش لاقي 
سبب للحب ده عندي 
ده حتّى لمّا تشتاقي 
تداري هواكي و تعاندي 

و عوِّدت الهوى فيَّه 
ما يستنَّاش هوى منِّك 
عشان لو كنتِ مش جايَّه 
ما اموتشِ فْـ بُعْد يوم عنِّك

***

و عايزاني أكون ليكي 
و بتغيبي .. و بتعودي 
كإن الحب لو فيكي 
مجرَّد حب لوجودي 

و لما فْـ لحظة بين نفسي 
و بيني اقول خلاص ماشي
أخاف أبعد و اغيب تِنسي
و قلبي لسَّه ما نساشي

...
...

و لو صعب انّى اقولهالك.. 
باقولهالك و باترجّى 
تصدّي قلبي لو جالك ! 
هتلقيلِك أكيد حِجَّة 

الاثنين، 9 أغسطس 2010

صاحبتِك !





ما لقيتش رد ياخد لي حقّي 
على اللي شفتُه في صُحْبِتِك 
غير انّي اشوف دمعك بيسقي 
حبّى الجديد مع صاحبتِك 

فسَّري بكيفِك و راحتِك 
قولي كل اللي تقوليه 
زي ما جرحتِ جرحتِك  
لكن انت جرحتِ ليه ؟ 


***


هاخلّي ليلِك يقتلِك 
قلتلها إيه عنّي و عنِّك ! 
و ازاي قدرت كده امتلك.. 
هواها.. واجي آخدها منِّك 

و هيوصلِك كلامي نفسُه 
متقالِّها بشوقه و همسُه 

و هاعيشلها من تاني عشقي 
 و انسى بطيبتها قسوتِك 

ما لقيتش رد ياخد لي حقّي 
على اللي شفتُه في صُحْبِتِك 
غير انّي اشوف دمعك بيسقي 
حبّى الجديد مع صاحبتِك 


***

باخدعها ؟ ليه ؟.. ما انت اللي شفتِ.. 
شوقنا و هنانا و حبِّنا 
و اخدعها  ليه ؟ .. عمرك عرفتِ.. 
ان الخداع طبعي أنا ؟ 

(و اشمِعنى هيَّه ؟) .. ما تسأليش 
مالِك و مالي ؟ سيبيني اعيش 

بكرة مسيرِك زيي تلقي..
قلب يساويكي فْـ نيِّتِك

ما لقيتش رد ياخد لي حقّي 
على اللي شفتُه في صُحْبِتِك 
غير انّي اشوف دمعك بيسقي 
حبّى الجديد مع صاحبتِك 

الأحد، 8 أغسطس 2010

دم الكسوف





عيدي ترتيب الصفوف..
بالأسامي و الحروف

و اشطبي فوق اسمي.. ماشي..
و اللي بعدي قدِّميهم..
مش هاقف استنى ردِّك

و اعلني بين الحواشي..
عاشقينك لسّه فيهم..
ألف واحد غيري عندك

و افصِدي دم الكسوف !

***

يا جميلة انت نسيتِ..
إني عارف كل لون..
راسمه بإيديَّه في وشِّك

و انِّك انتِ اللي جيتِ..
تطلبي منِّي أكون..
ليكِ لو حتَّى باغِشِّك

كنتْ لسَّه فْـ لون عينيكِ..
لسَّه ما وصلتِشْ لروحك
زِحت إيديَّه بإيديكِ..
إيه جرى صدَّقْتِ روحك !

***

(بُكرة تتعذِّب في بُعْدِي)..
باضحك امَّا بتقوليها..
ضحك من كتره يِبَكِّي

بٌكرة هَتحِـبِّي انتِ بَعْدِي..
و الحِكاية تِفهميها..
و هابقى مستـنِّيكي تحكي

ياللي فاكرة انِّك حبيبتي..
و انِّي هاتعذِّب بشوقي
غرِّتِك بالكدب طيبتي ..
دي نهاية الحلم.. فوقي

الخميس، 5 أغسطس 2010

الحب كله




حسيتيني حِسّ شاعر.. 
يلهمه صوت الطيور 

مسيتيني مس ساحر.. 
يِبْدِل الأشواك زهور 

نسيتيني الفرق بين.. 
اللي بتمسه الإيدين.. 
و اللي بيحسُّه الشعور 

حبيتيني الحب كله.. 
قلبي مش لاقيله ضِلُّه.. 
من كُتْر ما هُو واقف فـِ نور 

***

حسيتيني.. شفت عيد.. 
خُفْت مالأيام عَلَيَّ 

مسيتيني.. سِبْت إيد.. 
و إيد مداريَّه عينيَّه

نسيتيني الخوف .. جريتلك 
قلتِ : كون لِيَّ.. بقيتلِك 
قلتِ : كون عاشق جَسور 

حبيتيني الحب كله.. 
قلبي مش لاقيله ضِلُّه.. 
من كُتْر ما هُو واقف فـِ نور 


***

حسيتيني.. فُقْت بيكي.. 
من ألم جرحي القريب 

مسيتيني.. ضِعْت فيكي.. 
حُسْنِك الخلاّب رهيب 

نسيتيني الضعف .. بانت.. 
إن صورة الوش كانت.. 
بدر واحد بين بدور 

حبيتيني الحب كله.. 
قلبي مش لاقيله ضِلُّه.. 
من كُتْر ما هُو واقف فـِ نور ر


الجمعة، 2 يوليو 2010

الوحدة





إنت لوحدك لسّه
وانا زيّـك في الوحدة
إيه رأيك لو ننسى
كل كلام كان عدّى

و نسامح بعضينا
و مافيش جارح فينا
نبدأ تاني القصة

***

مش بسهولة هنقدر
عارف بس نحاول
خطوة فْـ خطوة و نصبر
في النص هنتقابل

و نفكر في حاجات
أقوى من الخلافات
بينّا حاجات تستاهل


***

حاول و اذا ما قدرتش
يبقى نصيبنا فراق
ما انا لسة ما جربتش
بس ساعات باشتاق

و ما ننفعش صحاب
بعد ما كنا احباب
لكن ينفع نرجع

..
ما انت لوحدك لسّه
و انا زيَّك في الوحدة

الأحد، 27 يونيو 2010

كبرت يا بنت




كبرت يا بنت
و لسّه القلب بضفيرة
بقيتِ يا بنت
عروسة جميلة و أميرة

و ألف قلب بيغنِّي
و مستنِّي و متمنِّي تكونيله
و قلبك لسّه مستنّي اللي يمسحله دموع ليله

ما تشغلهوش ملامح حُسْن
و يتشَرَّب حنانُه الحُزْن

هييجي يا بنت
هييجي و تخلص الحيرة

الثلاثاء، 22 يونيو 2010

فوق القمر




كتبت فوق القمر
اسمي و عنواني
يمكن تشوف القمر
يفكرك تاني

ولاَّ انت فاكرني
يا اللي انت هاجرني
عرَّفني.. صبَّرني
لانساك وتنساني


***

جاني القمر ليلة
قاللي حبيبك فين ؟
معقولة بين ليلة
و يوم تهونله سنين ؟

سكت من حيرتي
جابت النجوم سيرتي
قالت أدي حاله
كان ماله وحداني !


***


سألت قمري عليك
قاللي بقاله زمان
ضيه ما شافش عينيك
و لا عدت ليه سهران

كان لسة عنده كلام
و مشي وسابني قوام
ما بين نهار جاله
و حيرة واخداني



و كتبت فوق القمر
اسمي و عنواني
يمكن تشوف القمر
يفكرك تاني
....

الخميس، 17 يونيو 2010

ناس بتحب




ناس بتحب اللي بتحتاجله
حب ساعات و يغيب
و ناس بتحب اللي بتوصَلُّه
زي الهوى ما يجيب

و ناس بتحب الوِشّ.
بتهوى الصورة
و ناس بتحب تغش
قلوب مكسورة

و ناس من كتر الحب يِصَلُّوا
يدعو لقلب حبيب

***

كل بداية قصة حب
قلب بيتعَوِّد على قلب

قربه راحة.. و بعده حنين
يوم بيزيد.. و يوم بيقِلّ
تبقى عشرة بعد سنين
ناس بتصون.. و ناس بتمِلّ

***

كل نهاية قصة حب
قلب بيتغَيَّر على قلب

تبدأ شمس الحب تميل
ينقص نور.. يكبر ضِلّ
يبقى طريق الفرقة بديل
ناس بتعود.. و ناس بتضِلّ

...
ناس بتحب اللي بتحتاجله
حب ساعات و يغيب
و ناس بتحب اللي بتوصَلُّه
زي الهوى ما يجيب

و ناس بتحب الوِشّ.
بتهوى الصورة
و ناس بتحب تغش
قلوب مكسورة

و ناس من كتر الحب يِصَلُّوا
يدعو لقلب حبيب

الثلاثاء، 15 يونيو 2010

وسط أوراقي القديمة




وسط أوراقي القديمة
رجعت الذكرى الأليمة

صورة ليها..
فيها آخر لحظة جمعت قلبي بيها
غصب عني لمحتها
و بشوق و لهفة حضنتها

رجعتني للي راح
للي فات قلبي بجراح

كنت فاكر انه ماضي
و اني فوق الجرح ماضي

بس اتاري ان البعاد
سابلي نار تحت الرماد
نار قادتها فيَّه تاني
صورة من آخر معاد

صورة ليها..
فيها آخر لحظة جمعت قلبي بيها
غصب عني لمحتها
و بشوق و لهفة حضنتها

لحظة جمعت بين قلوبنا
فرَّقت شوقنا فْـ دروبنا

ضيَّعتنا.. جرَّحتنا..
و بدموعنا يوم سابتنا..

زي ما يكون الزمان
عارف انه مالوش أمان
خدها مني و سابلي منها
صورة مالحب اللي كان

صورة ليها..
فيها آخر لحظة جمعت قلبي بيها
غصب عني لمحتها
و بكل قسوة حرقتها

الاثنين، 7 يونيو 2010

أحلى حب




صدقيني هالقى بعدك
زي ما انتِ هتلقي بعدي
ألف قلب

هانسى وسط حياتي بعدك
زي ما انت هتنسي بُعدي
بأيّ قُرْب

بس مش هانساكِ انتِ
حتى لو قلتيها انتِ
تبقى كدْب

كل واحد له حياتُه
بس باقي في ذكرياته
أحلى حب

من سُكات




قاللي (في نهاري انت جنبي)
قلت (مين بيفارقه ضلُّه !)
قال ( و في الليل جوّه قلبي)
قلت  ( و انت قلبي كلُّه)

قاللي ( روحي)
قلت (روحنا)
قاللي (فين؟)
قلت (احنا !)
قاللي (مين ؟)
قلت (هات..)
قاللي (خدني من سُكات)

زدتُه.. زادني.. زاد فَرَحْنَا

فارس الأحلام




فارس الأحلام.. مش أنا !
كل حبي كلام في الغُنا !

في حاجات كتير نفسي
و لحَدّ ما تجيني
ما املكش غير نفسي
ازاي تحبيني ؟

لو حتى في الأحلام حبِّنا
فارس الأحلام.. مش أنا !


***


و اذا فارس الأحلام أنا..
انت مين ؟

جزء من حلمي تكوني ؟
حبي آخر حاجة فيه
تقبلي لو قلت (كوني) ؟
تفضلي.. تستنّي ليه ؟

ما انتِ حلم لحد تاني
حلم واحد مش أناني


فارس الأحلام.. مش أنا

***


و اذا فارس الأحلام أنا..
انت مين ؟

جزء من لحظة جنوني ؟
و امّا تخلص تبقى إيه ؟
صعب تفتكرك عيوني
قلب مرة لعبْت بيه

و ابقى خاين و ابقى جاني
و انتِ برضه لحدّ تاني !


فارس الأحلام.. مش أنا


الجمعة، 4 يونيو 2010

قفلت ليه بابك ؟




قفلت ليه بابك ؟
و عيني ما عدِّتوش
إذا كانلك احبابك..
قلبك أنا ما جيتلوش !

إنت اللي جيت عندي
مادد إيديك بسلام
قدِّمتِِـلَك وِِدِّي
بمحبّة و احترام
و فْـ ليله بتعدّى
يتغَيّر الكلام

ريّحني بغيابك
الحال ده ما ارتاحلوش

***

كدّبت نفسي كتير
مع إني بيك حاسس
حسيت فيه فرق كبير
عنَّك زمان خالص

قلت الزمان يعني
ساب مين على حاله
الوش مش مَعْني
القلب إيه جراله ؟

***

كان باين مالعينين
للقلب شيء واصل
لسّه متغربين
واحنا بنتواصل

قلت البعاد يعني
بِيـْقَسّي في الغربة
لكن ليه توجعني
و تجرح الصُّحبة



قفلت ليه بابك ؟
و عيني ما عدِّتوش
إذا كانلك احبابك..
قلبك أنا ما جيتلوش !

إنت اللي جيت عندي
مادد إيديك بسلام
قدِّمتِِـلَك وِِدِّي
بمحبّة و احترام
و فْـ ليله بتعدّى
يتغَيّر الكلام

ريّحني بغيابك
الحال ده ما ارتاحلوش

الاثنين، 31 مايو 2010

يعزّ عليَّ




يعزّ عليَّ اشوف دمعك و انا ماشي
و مش بإيديَّ.. قلبي معاك ما خلاّشِ
كلام إلا و قالهولك
و جرح فْـ جرح نسيهولك
و قلبي خلاص سايبهولك
خده.. و عينيَّ خدها معاه.. ما تغلاشِ


عايزني إيه ؟ مش عارف
قصاد الناس شبح واقف
و صوت بالليل يغنيلك

عايزني ليه مادام خايف
و اكدِّب عيني و انا شايف
هواك بيضيع و باوفيلك

تعبت خلاص و مش قادر
أكون غايب و انا حاضر



فرص تاني مافيش عندي
و مش باعند و لا قصدي
لكن و لا شيء هيتغيَّر

لا يوم عندك فرَق بُعْدي
و لا خوفي على وعدي
صاينهولك و مستكتر

عايزني ليه حبيب قلبَك ؟
هيرضيك لمّا اموت جنبك !


.. يعز عليّ اشوف دمعك وانا ماشي
و مش بإيديَّ.. قلبي معاك ما خلاّشِ
خده.. و عينيَّ خدها معاه.. ما تغلاشِ

الأحد، 16 مايو 2010

حُسْن البَنَات



خليت حسن البنات
مقياسه من حسنك
و فرحت إني أبات
شريك دموع حزنك

و انا فاكر اني كده
بانول منك رضا
و اتاري كل ما فات
لعبة صحاب سنِّك


***


ما اعرفش إيه فيكي
حسسني يوم بيكي
غير قلب كان واهم
مستعجل الإحساس

و لقيتي في إيديكي
فرصة لحكاويكي
و ساعتها كان لازم
تكملي و خلاص


***


صغَّرت نفسي سنين
صغِرت جوّه عنين
ملِّت هوى عاشق
عمَّال يعيد في كلام

عشتِ يومين حلوين
لكن على حساب مين
عندك ماهوش فارق
ماهي كلها أيام

***

بعد الزمان بزمان
قلبك رجع ولهان
شايفاني في الأحلام
واقف على بابِك

غلطانة في العنوان
و انا كمان غلطان
لو اصدَّق إنه غرام
اللي هنا جابِك