الاثنين، 31 مايو 2010

يعزّ عليَّ




يعزّ عليَّ اشوف دمعك و انا ماشي
و مش بإيديَّ.. قلبي معاك ما خلاّشِ
كلام إلا و قالهولك
و جرح فْـ جرح نسيهولك
و قلبي خلاص سايبهولك
خده.. و عينيَّ خدها معاه.. ما تغلاشِ


عايزني إيه ؟ مش عارف
قصاد الناس شبح واقف
و صوت بالليل يغنيلك

عايزني ليه مادام خايف
و اكدِّب عيني و انا شايف
هواك بيضيع و باوفيلك

تعبت خلاص و مش قادر
أكون غايب و انا حاضر



فرص تاني مافيش عندي
و مش باعند و لا قصدي
لكن و لا شيء هيتغيَّر

لا يوم عندك فرَق بُعْدي
و لا خوفي على وعدي
صاينهولك و مستكتر

عايزني ليه حبيب قلبَك ؟
هيرضيك لمّا اموت جنبك !


.. يعز عليّ اشوف دمعك وانا ماشي
و مش بإيديَّ.. قلبي معاك ما خلاّشِ
خده.. و عينيَّ خدها معاه.. ما تغلاشِ

الأحد، 16 مايو 2010

حُسْن البَنَات



خليت حسن البنات
مقياسه من حسنك
و فرحت إني أبات
شريك دموع حزنك

و انا فاكر اني كده
بانول منك رضا
و اتاري كل ما فات
لعبة صحاب سنِّك


***


ما اعرفش إيه فيكي
حسسني يوم بيكي
غير قلب كان واهم
مستعجل الإحساس

و لقيتي في إيديكي
فرصة لحكاويكي
و ساعتها كان لازم
تكملي و خلاص


***


صغَّرت نفسي سنين
صغِرت جوّه عنين
ملِّت هوى عاشق
عمَّال يعيد في كلام

عشتِ يومين حلوين
لكن على حساب مين
عندك ماهوش فارق
ماهي كلها أيام

***

بعد الزمان بزمان
قلبك رجع ولهان
شايفاني في الأحلام
واقف على بابِك

غلطانة في العنوان
و انا كمان غلطان
لو اصدَّق إنه غرام
اللي هنا جابِك







الأحد، 9 مايو 2010

عارف



عارف انك الليلادي بتبكي.. عارف
زي ما تكوني قصاد عيني و شايف

قلبي حسِّك..
زي ما تكون الدموع نازلة علَيَّ
وصله حِسِّك..
اللي عمره ما حاشه بعدك عن عينيَّ

بس مش عارف..
بتبكي قلبي ولاّ قلب تاني..
ولاَّ قلبك في الليالي وحيد و خايف

***


فات زمان
عاللي كان بينّا زمان
يا ترى حبيتِ بعدي ؟
يا ترى حسيتِ بعدي بالأمان ؟

و اما وسط الليل بتبكي حد سامعك ؟
ولاّ فوق الخد إيدك ماسحة دمعك ؟
دمعة الظالم على المظلوم في ليلُه و هوّ آسف

عارف انك الليلادي بتبكي.. عارف

***


الغريب
إني على بعدي قريب
في الطريق بالمح عينيكي
و في الليالي الحلم بيكي

و امّا ياخدني كلام الشوق في غنوة
بانسى جرحك و افتكرلك لحظة حلوة
و المحك زي الليلادي كإني قدامك و واقف

عارف انك الليلادي بتبكي.. عارف