..و بشروط !

لما وسط الناس تقولي..
بالتراب بعت الياقوت
لما تستني وصولي..
زي طير مستني قوت

لما تبقى الليلة أطول من سنين عمر فات
لما يبقى عندك أسهل من رجوعي المعجزات

يمكن أرضى ساعتها و اقبل..
تبقى ليّه .. و بشروط !

***

يعني إيه كان بينّا وعد ؟
وعدي كان قصاده وعدك
يبقى مش فاضل وعود

يعني إيه بنحب بعض ؟
عشتِ بعدي و عشتْ بعدك
يعني ما وقفش الوجود

وفَّري عالقلب ذلُّه

ولاّ اقولِّك حقّي كلّه

يمكن أرضى ساعتها و اقبل..

تبقى ليّه .. و بشروط !

***

الدموع مش اعتذار

تبكي ليلِك.. تبكي عمرِك

حق من ضمن الحقوق

حتى لو في القلب نار

ما انت سبتِ في قلبي جمرك

جربي نفس الحُروق

اعرفي قيمة اللي ضاع

غيري طبع الخداع

يمكن أرضى ساعتها و اقبل..

تبقى ليّه .. و بشروط !

كان الطريق فاضي

كان الطريق فاضي

عدّيتِ ليه قصادي

ما كنت خالي البال

غيَّرْتِ بس الحال

و يروح و ييجي سؤال

و اتعب على الفاضي

أوِّل ما جت عيني في عنيكي.. صوَّرلي..

جنوني.. و حنيني.. صوتك بيندهلي

و اتاري الصوت حقيقي

و اسمي كمان حقيقي

و انا اللي مش حقيقي

على غيري بتنادي

مين اللي ناديتيله ؟  صحّ اللي حسيته ؟

طب ليه شاورتيله.. عليَّ و مشيتوا ؟

ما يكون اللي يكونه

و انت معاه أو بدونه

على إيه ضحكت عيونه !

قلتيله ده الماضي ؟!

كان الطريق فاضي

عدّيتِ ليه قصادي

باختصار..

صدقيني..

مش بارُدّ الجرح..

لكن مش بإيدي

اللي بينّا راح..

ما عادشِ له رجوع..

مهما تزيدي

باختصار..

فيه واحدة تانية..

باختيار العقل بس..

و مخلصالي

و انتِ..

ضيَّعتِ في ثانية..

اللي بيه القلب حسّ..

و عمر غالي

صدقيني..

و عمري ما قد النهارده كنت صادق

لسّه فيَّه.. رغم بعدك.. رغم جرحك.. قلب عاشق

بس فيه حاجات ما ينفعش تعود

زي ما فيه حب.. فيه عشرة و وعود

صدقيني..

كل ما افرح كنت باتمنّى تكوني

جنبي،، و تشوفي اللي كان بينّا زمان.. حلم فْـ عيوني

كنت حاسس ان ليكي حق فيَّه

و لسَّه حاسس.. بس صعب قوي عليَّه

باختصار..

فيه واحدة تانية.. 

باختيار العقل بس.. 

و مخلصالي 

و انتِ..

ضيَّعتِ في ثانية.. 

اللي بيه القلب حسّ.. 

و عمر غالي