الخميس، 28 أبريل 2011

نور القمر




فوق خدودك.. يا صبيَّة.. 
ضحكة من نور القمر
لو عليكي أمّر ليَّه.. 
كنت أقول قلبي أمر 

ضحكتك و القلب شايفك.. 
ما تفارقشي يوم شفايفك 

و ان داريتها دموع عينيكي.. 
ضميهالي بين إيديكي.. 

و ابكيهالك من عينيَّه 
بس اشوف الضحك ديَّه 

فوق خدودك.. يا صبيَّة.. 
ضحكة من نور القمر 

***
قد إيه الضحكة حلوة.. 
لما بتنوَّر وشوش 

تصفى تبقى أحلى غنوة.. 
لما تحضنها الرموش 

بس في عينيكي انت أحلى
ضحكة زي المية سهلة

و ان داريتها دموع عينيكي.. 
ضميهالي بين إيديكي.. 

و ابكيهالك من عينيَّه 
بس اشوف الضحك ديَّه 

فوق خدودك.. يا صبيَّة.. 
ضحكة من نور القمر 

***

و فْـ كسوفك ويّا صمتك 
و الإيدين فوق الخدود 

لما اشوفك بابتسامتك 
أقوى من كل الردود

اوعي لحظة تخلّي حزنك 
يخفي بسمة راسمة حسنك

و ان داريتها دموع عينيكي.. 
ضميهالي بين إيديكي.. 

و ابكيهالك من عينيَّه 
بس اشوف الضحك ديَّه 

فوق خدودك.. يا صبيَّة.. 
ضحكة من نور القمر



الثلاثاء، 19 أبريل 2011

ما عرفتكيش




ما عرفتكيش... 
رغم ان قلبي كان عاشق... 
وعشقه عمر ما ينتهيش 

رغم ان حبي كان في دربي..  
نهر مهما شربت منه ما بارتويش 

وكنت بـ المح طيف هواكي...  
قبل ما تلوحي برؤاكي 

ما عرفتكيش

***

نفس العينين من غير بريق  
والقلب هو ولاهوش بريء 

مـديت إيديَّ ضـمـت إيديكي  
ضـاع الدفــا بـيـنهـم غـريق 

إيه اللي اختلف انتِ و انا    
ولا الهوى صابح جريح 

حاسس كإني ماشفتكيش   
قبل النهارده يمكن صحيح 
ما عرفتكيش

*** 

حسيت في إيدك بانتفاض 
والقلب جواه انقباض 

رغم انه صيف حسيت شتا  
و فـ لحظة دمع عنيكي فاض 

كانت دموع من غير بكا   
بتقول هوانا ده كان خداع 

سامحيني حبك ما يتبكيش    
لكن هاقول قبل الوداع 
ما عرفتكيش