ما عرفتكيش...
رغم ان قلبي كان عاشق...
وعشقه عمر ما ينتهيش
رغم ان حبي كان في دربي..
نهر مهما شربت منه ما بارتويش
وكنت بـ المح طيف هواكي...
قبل ما تلوحي برؤاكي
ما عرفتكيش
***
نفس العينين من غير بريق
والقلب هو ولاهوش بريء
مـديت إيديَّ ضـمـت إيديكي
ضـاع الدفــا بـيـنهـم غـريق
إيه اللي اختلف انتِ و انا
ولا الهوى صابح جريح
حاسس كإني ماشفتكيش
قبل النهارده يمكن صحيح
ما عرفتكيش
***
حسيت في إيدك بانتفاض
والقلب جواه انقباض
رغم انه صيف حسيت شتا
و فـ لحظة دمع عنيكي فاض
كانت دموع من غير بكا
بتقول هوانا ده كان خداع
سامحيني حبك ما يتبكيش
لكن هاقول قبل الوداع
ما عرفتكيش
ليست هناك تعليقات:
إرسال تعليق