ما لقيتش رد ياخد لي حقّي
على اللي شفتُه في صُحْبِتِك
غير انّي اشوف دمعك بيسقي
حبّى الجديد مع صاحبتِك
فسَّري بكيفِك و راحتِك
قولي كل اللي تقوليه
زي ما جرحتِ جرحتِك
لكن انت جرحتِ ليه ؟
***
هاخلّي ليلِك يقتلِك
قلتلها إيه عنّي و عنِّك !
و ازاي قدرت كده امتلك..
هواها.. واجي آخدها منِّك
و هيوصلِك كلامي نفسُه
متقالِّها بشوقه و همسُه
و هاعيشلها من تاني عشقي
و انسى بطيبتها قسوتِك
ما لقيتش رد ياخد لي حقّي
على اللي شفتُه في صُحْبِتِك
غير انّي اشوف دمعك بيسقي
حبّى الجديد مع صاحبتِك
***
باخدعها ؟ ليه ؟.. ما انت اللي شفتِ..
شوقنا و هنانا و حبِّنا
و اخدعها ليه ؟ .. عمرك عرفتِ..
ان الخداع طبعي أنا ؟
(و اشمِعنى هيَّه ؟) .. ما تسأليش
مالِك و مالي ؟ سيبيني اعيش
بكرة مسيرِك زيي تلقي..
قلب يساويكي فْـ نيِّتِك
ما لقيتش رد ياخد لي حقّي
على اللي شفتُه في صُحْبِتِك
غير انّي اشوف دمعك بيسقي
حبّى الجديد مع صاحبتِك
يا ترى بكده قدر فعلا ياخد حقه منها ؟؟
ردحذفيا ترى فعلا حب صحبتها بجد ؟؟
وإشمعنا صحبتها ؟؟؟
يا ترى البشر بيعرقوا يحبوا بجد ؟؟؟ ولا كلنا عايشين في وهم كبير جدا وكل مشكلتنا أنه يكون في طرف تاني يشاركنا الحياة وبس ???
علاقات غريبة ناس كانت قريبة جدا بقت أبعد ما يكون وناس ما كانتش موجودة تظهر وتاخد مكان ناس تانية
وناس تمشي وناس تيجي وناس تتواجد في حياتنا بدون داعي وفي النهاية كل ده من اختيارنا
يقول الإمام علي ـ كرم الله وجهه ـ : الناس نيام ، إذا ماتوا انتبهوا.
ردحذفالمشكلة أنه انتباه بعد فوات الفَوْت !