ناس تانيين

لما القلوب بتموت..

بيطلعلها ناس تانيين

شبه اللي ماتوا زمان..

لما كانوا بالقلوب عايشين

اكتب وصية للحبايب كلهم

قولهم: 

لو قلبي مات..

و طلعلي واحد تاني..

موّتوه.. 

و ارحموا العايشين

مش إنتَ

مش عارف أقولَّك من إمتى 

وانا حاسَّك إنتَ و مش إنتَ

مش لمسة إيدَك .. مش هيَّ

مش نفس الشوق و الحِنِّيَّة

و تشوفني عينيك تِهْرب فيَّ

بتخبِّي عليَّ ؟ من إمتى ؟

***

هتقول لمين غيري ؟.. تعال

ارتاح مِـ الهم هنا فـ حضني

ياما هنعدِّي بميت حالة

و هتفتح حضنك و تاخدني

و ساعتها هاجيلك و احكيلك

و انسى دنيتي في سكن ليلك

ولا عندي هوا يبقى بديلك

و لا عندي حبيب غيرك انت 

***

مضايقني بعادك في وجودي

و كإنك متمنّي غيابي

و استحمل ضيقك بردودي

و سؤالي و حيرتي و عتابي

و سكوتي يعلى في سكوتك

و الدمعة المخنوقة في صوتك

و ساعات بتفوتني و تفوتك

من عمر هوانا.. و لإمتى ؟

كل سنة

قلبي موجوع من بعاده

بس كان قاسي فـ عناده

ضيع الحب و وداده

اللي كان عمّال يزيد

و اللي صحى الجرح آدُه

رنة كان فيها معاده

الليلادي عيد ميلاده

كل سنة و احنا بعيد

‫***‬

كل لحظة حلوة لينا

بعد فرقة ذكريات

تيجي تاني و تنادينا

لما توحشنا حاجات

نلقى بينا عمر عدّى

و اللي خدناه مالمودَّة

جرح نفضل فيه نعيد

‫***‬

بعد أيام المحبة

بعد أحلام السنين

اللي كبرت حبة حبة

ينتهي المشهد حزين

كنا أريح لو فضلنا

في المناسبات اتجاملنا

مش دموع و الليلة عيد

أَ بَ تَ ثَ حُبٌّ

الألف أصل الوجود في الدنيا حب 

و الباء بقينا أنا و انت أجمل لحن حب 

و التاء تداري مهما تداري.. عينيك هتبكي بدمع حب 

و الثاء ثبت إن اللي قلبه يوم صدق.. عمره ما يقدر ينسى حب 

و الجيم جواب من قلب غاب.. يمسح عذاب كان سببه حب 

و الحاء حنين ما يضيعوش بُعد السنين .. لما الزمان يرجع بحب 

و الخاء فيه خوف كاتم حروف نابضة في جوف بتقول يا حب 

و الدال دوا كل الجروح إنك تبوح للي شايله نبض حب 

و الذال ذليل وقت الأصيل.. قلبك كسير و انت أسير.. ياللي اتعاليت على أي حب 

و الراء رئيت و بشوق هويت.. و ان يوم نسيت و بلوم قسيت.. قلبك كبير لسه يا حب 

و الزاي زهور مالية الجناين.. و نور في وشك حتى باين..

ياللي مشيت و القلب صاين جوه منه صدق حب  

و السين سماح لو قلبي ناح.. و فـ يوم بكى على قلب راح ..

فـ لحظة خان اللي صدقله بكل حب 

و الشين شموس الدنيا نورها ينطفي.. لو يوم لقينا قلوبنا منها يختفي رسمك يا حب 

و الصاد صديق ياخد بإيدك عالطريق.. تشكيله همك و تناديله فـ وقت ضيق..

تعرف ساعتها معنى حب 

و الضاد ضمير فيه المصير.. لو يوم عمي تصبح ضرير.. ما تشوفش حتى لفظ حب 

و الطاء طليق زي الطيور.. قلبه البريء اتحاط بسور..

و صبح غريق تاكله النسور.. يوم ما انخدع قلبه بحب 

و الظاء ظروف ياما غيرت في قلوبنا حب 

و العين عزول نفسه يزول مالدنيا ديه كل حب 

و الغين غزل يرمي الشباك.. يبدأ ولا ينهي اشتباك.. إلا و هواه أصبح هواك..

يخلص ولا يخلصشي حب 

و الفاء فلوس تشري النفوس.. و كمان قلوب فوقها تدوس.. إلا اللي فيها إخلاص و حب 

و القاف قاموس الدنيا إيه لو كل كلمة باقية فيه و شلنا منه لفظ حب 

و الكاف كلام قالوه زمان عمرك ما تخلص في يوم لقلب إلا و تلقى حصاده حب 

و اللام لاموني لما لاقوني باكتب قصيدة باسم حب 

و الميم منين نجيب سنين و قلب يتسحمل أنين لو كل يوم ننزف بحب 

و النون نموت لو يوم يفوت ولا نلقى فيكي يا دنيا حب 

و الهاء هنا ناس مننا بتقول مافيش في الدنيا حب 

و الواو ده ويل و أمر ويل للي هوى ولا طالش حب 

و الياء يا قلبي قولي مين في الدنيا يستاهل ده حب 

قولي مين في الدنيا يستاهل ده حب

قولي مين في الدنيا يستاهل ده حب

آخر حدّ

 لو هتلوم كل الناس 

لومني انا آخر حدّ 

انا حسيتك احساس 

ما يحسوش حد بحدّ 

و لـَمَسني هواك ما انكِرْش

اكتر من كده ما قدِْرش
و استنيت ما اتغيرش
بالعكس جرحني بجد

***

ما تجيش بعد الأيام
ما خدت كل الأحلام
تتمنى نعيش في سلام
و كإننا في الحواديت

 ولا عايز أعيد في كلام
ولا مين فينا يتلام
اصحى و فوق مالأوهام
زي انا قبلك ما صحيت

جايز قلبي ما صبِرْش

لكن وقتها ما هجرش
عصفور في إيديك و ما طارش
غير لما فتحت اليدّ

***

عدِّت عالقصة سنين
ما ماتتش في القلبين
بس ما عدناش اتنين
نفضل نرجع و نروح

ننفع غنا للسامعين
أو بين قصص العاشقين
أو يمكن فيلم حزين
لكن أكتر مش مسموح


القلب عشق ما كفرش
و نصيبه ما اتقدَّرش
و رضي و ما يتصورش
تفضل تجرح في الردّ

...
...

 لو هتلوم كل الناس 

لومني انا آخر حدّ 

انا حسيتك احساس 

ما يحسوش حد بحدّ

لمّا انت دايب كده ..!

لمّا انت دايب كده ..!

سكت ليه كل ده ؟

دانا كنت جنبك و انا

في قلبي ميت محزنة

بيعدِّي يومي فْـ سنة

و أتمنّى بس الرضا

***

حبيتني إمتي ؟؟ .. قول ..

حسيتني ؟ .. كان باين ؟

ليه ما قلتليش علطول  ؟؟

ليه فضلت تتحاين ؟؟

دانا قلت (فيه غيري).. 

و لُمت تقصيري .. 

و لا جه في تفكيري

يهواني قلبك ؟ .. أنا ؟؟

دانا كنت جنبك و انا

في قلبي ميت محزنة

بيعدِّي يومي فْـ سنة

و أتمنّى بس الرضا

***

كل اللي فات له حساب

يترد مش ناقص

قد ما شفت عذاب

عايزه غرام خالص

تعشقني و تراضي..

بعشق مش عادي..

أنسى معاه الماضي

يفضلي بس الغُنا  

دانا كنت جنبك و انا

في قلبي ميت محزنة

بيعدِّي يومي فْـ سنة

و أتمنّى بس الرضا

وأد الضمير

الكدب مش أسوأ خصال الناس 

في ساعات بيتبرَّر بلحظة خوف 

و الرحمة تسبق عند باب العدل 

أسوأ كتير العُهْر بالإحساس 

وأد الضمير تحت أي ظروف 

يسوى و يفوق في ذنبه جُرْم القتل 

أوهام

عودت نفسي ما اصدقهاش 

عشان ما يبقاش بينّا كلام

بتقول حاجات و ما تعملهاش 

و حِجَجْها صعبة قوي الأحلام

حرّمتها رغي الحكايات 

علمتها تِتْعان بِسُكات 

سلٌمتها كل البدايات

اللي اتْنَوِت و ما تمّتْهاش 

جايز تفوق بقى مالأوهام

ما عنديش كلام

ما عنديش كلام 

و كل الكلام بيترجَّى فيَّ أقولك كلام 

وحشتِ الكلام 

و انا لسه قادر أعافر في قلبي و اشدّ اللجام 

حزينة أكيد ! 

و حزني يفوق السكات  في البكا و الصراخ في العَديد 

و عارف أكيد.. 

معنى سبق الترصد و إصراري أقتل حبي الوحيد 

لكن ده اللي كان.. 

و اللي لازم يكون 

يموت الغنا..  

البسيط الحنون

و اصحي الضمير  

اللي بيه مستجير 

ماهوش عاشق اللي بعشقه يخون

ما عنديش كلام 

سكت كل كوني في لحظة سكوني لوأد الغرام 

و راضي الختام 

و راضي المشيئة ما هي دي الحقيقة برغم الآلام 

ما متش جديد

عشان متّ مرة زمان لما كان موتي يفيد 

لكنك بعيد

و مهما هاقرَّب.. لا عمري هاكونلك .. و لا اصبح شهيد

ماهو ده اللي كان.. 

و اللي لازم يكون 

يموت الغنا..  

البسيط الحنون

و اصحّي الضمير  

اللي بيه مستجير 

ماهوش عاشق اللي بعشقه يخون

خليني جنبك

ما تخلِّيك جنبي

و خليني جنبك

و لا قُرْبِنا ذنبي

و لا بُعْدِنا ذنبك

علشان لما نحتاج بعضنا

نلقى حد يهمُّه أمرِنا

يسمع منِّنا

يحفظ سرِّنا

ميـن يحفظ أكتر

من قلبي و قلبك ؟

***

قد ما رحنا من بعض كتير 

قد ما نرجع أقرب اكتر

و كإن اللي ما بينَّا ده مصير

نستغربه لو فيه هنفكَّر

بنقول على كل فراق ده أخير

و اتاريه برجوعنا متقدَّر

...

علشان لما نحتاج بعضنا

نلقى حد يهمُّه أمرِنا

يسمع منِّنا

يحفظ سرِّنا

ميـن يحفظ أكتر

من قلبي و قلبك ؟

*‫**‬

لو نتحاسب نلقى اختلافات

ما تْجَمَّعْشي قلبيـن ثانية

لكِن الواضح من كل ما فات

اللي بيجْمَعنا حاجات تانية

أرواح رغم بعادالمسافات

عايشة في دنيا غير الدنيا

...

علشان لما نحتاج بعضنا

نلقى حد يهمُّه أمرِنا

يسمع منِّنا

يحفظ سرِّنا

ميـن يحفظ أكتر

من قلبي و قلبك ؟

...

...

ما تخلِّيك جنبي

و خليني جنبك

الماسات المذْهِلَة

كنا اتفقنا عالدعا بالغيب لبعض  

كنا اتفقنا عالوفا لو خدنا بعد 

بس القلوب صاينة الوعود قليِّلة 

نادرة كما حر الماسات المذْهِلَة 

و قلبي كان عاشق و في العشق ابْتِلا 

و صبح بلا عشقه و لا مشتاق لنبض

***

رب القلوب يهدي القلوب و يهدَّها 

أعلم بما قبل النوايا و بعدها 

ما الكل مظلوم مين يقول على نفسه ظالم 

و الكل له حق و بيدعي رب عالم 

تخلص دموع الناس و يفضل عِنْدَها

***

و انا دمعتي على غلطتي فـ حقي أنا 

مجروح و جارح .. غربتي.. جوَّه هنا 

لا يفيد حساب لا يفيد عتاب لا يفيد عشم
كتر الدوا ما بيداويش كتر الألم

و الوقت بيلم الجراح من عمرنا

‎حاسب نفسك

‎حاسب نفسك.. 

مهما الناس انشغلوا بأمرك 

‎أدرى بنفسك.. 

عمر الناس ما تحس بجمرك 

‎اقفل بابك.. 

احبس روحك.. 

اصرخ فيها 

‎خلي عذابك.. 

يكوي جروحك.. 

مش يداريها 

‎و انت بنفسك.. 

ضفرك عمره ما يجرح ضهرك


اللي هيفتكرك خلِّيه.. صاحب و صديق
قلب الناس نادر تلاقيه.. مش قاصد شيء

شيل بإيديك.. ما تشيِّلهوش
و اللي هينساك ما تحاسبوش

‎اقفل بابك.. 

احبس روحك.. 

اصرخ فيها 

‎خلي عذابك.. 

يكوي جروحك.. 

مش يداريها 

‎و انت بنفسك.. 

ضفرك عمره ما يجرح ضهرك

و اللي نسيك.. لو يوم احتاجك.. روحله و شوف
جايز و انت ما بين أمواجك.. كان مكتوف

اوعى تلومه في أي ردود
و لا تستنَّي جميل مردود

‎اقفل بابك.. 

احبس روحك.. 

اصرخ فيها 

‎خلي عذابك.. 

يكوي جروحك.. 

مش يداريها 

‎و انت بنفسك.. 

ضفرك عمره ما يجرح ضهرك 

‎حاسب نفسك.. 

مهما الناس انشغلوا بأمرك 

أغاني مسروقة

الناس حكاياتها بقت متعادة و محروقة 

و كإنه مسلسل .. 

مطّ .. و حوارات ملزوقة 

اللي يحب استنّى فراقه 

و اللي يغيبوا تاني يشتاقوا 

استعباط و الناس فيه ساقوا 

نص الهوى كدب .. 

و نصه أغاني .. و مسروقة

اللقا بمعاد

الحروف بتقولي 

إنها كانت بايتة عالشفايف 

تتقري و تتعاد 

الحروف بتقولي 

قلبها لسه بيهوى.. بس خايف 

حتى و احنا بعاد 

و بتغضب مليون مرَّة
و بتضحك مرات تانية

و بتبكي جوه و بره 

و بتسرح ساعة و التانية 

بتقولي كلام اكتر بكتير..  ما باقولهوشي 

حتى الحلم اللي حِـلٰمِتُه بيَّ .. ما حكتوشي 

الحروف بتقولي
سيبها لو حاببها .. ما انت عارف 

اللقا بمعاد

ضعف إنساني

كل ما تغيب الحياة عنَّك 

كل ما تحس القلوب باردة 

كل ما تفلت دموع منَّك 

أو بس تلقى ضحتك شاردة

هتفتكرني 

و هتفتكر كل الكلام تاني 

و هتوحشك أغانِيَّه  و حناني 

طبع القلوب في الوحشة تلقاها 

فاكرة اللي حب بضعف إنساني 

كل ما يعدِّي القمر مكسور

من طول ليالي و هو مش جنبك

كل ما تاخدك خيوط النور

و الفجر بيشقشق على قلبك

هتفتكرني

و هتفتكر كل الكلام تاني 

و هيوحشك سَهَرْنا و جناني 

طبع القلوب في الوحشة تلقاها 

فاكرة اللي حب بضعف إنساني 

كل ما تحضن إيديك روحها

و تداري لهفة شوقها للمسة

كل ما تشتاقلي سامحها

فيها اللي فيها هي مش ناقصة

بتفتكرني

و هتفتكر كل الكلام تاني 

و هيوحشك إحساسي بيك تاني 

طبع القلوب في الوحشة تلقاها 

فاكرة اللي حب بضعف إنساني 

معجزة

انفلت خيطي الأخير 

و السبب يمكن بسيط 

بس قبله خيوط كتير 

كل خيط كان بعده خيط 

ما اختلفشي خيط عن التاني فْـ مصيره

بس آخر خيط ما كانشي بعده غيرُه

و رجوعه تاني.. معجزة..

إلا إذا..

رجَّعنا عصر المعجزات

***

اللي انكسر أصبح فتات 

مرِّت عليه الريح و طار 

و الباقي منه ذكريات 

زي الرماد من بعد نار 

زي الساعات لما تفوت بيها الثواني

زي اللي مات.. عايزينه يرجع لينا تاني

و رجوعه تاني.. معجزة..

إلا إذا..

رجَّعنا عصر المعجزات

***

الألم في القلب ساكن 

حتَّى لمَّا تطيب جراح 

و النَّدم لازم.. و لكن 

للي جاي.. مش اللي راح 

و السكات في لحظة أقوى مالدموع

لما شيء منا يضيع مالهوش رجوع

و رجوعه تاني.. معجزة..

إلا إذا..

رجَّعنا عصر المعجزات

ماهوش مرغوب

حِسَّك إنَّك ..
شخص ماهوش مرغوب في وجوده ..
ما بيغلطش
فما تغلطش و تعنِد فيك..
لإن مافيكش كرامة تكفّي..
تكون مرفوض و ما تفهمش
و ما تقبلش ضمير متأنِّب ..
أو مستغرب ..
ينكر ـ طبعا ـ  قوي .. و يرحَّب بيك من تاني
اللي بيقتل أكتر لما الخنجر يطلع مالمطعون
فما تسألش
صدَّق نفسك..
حِسَّك إنَّك ..
شخص ماهوش مرغوب في وجوده..
و ما تفضلش

الحلم

الحلم لما تشوفه قدامك حقيقة..

مخيف !

الحلم..  مش لحظة وصول 

الحلم..  عمر بتجري منه وراه 

و بتكتشف آخر المطاف..

الدايرة..

و التصاريف 

مجرد لحظة

مجرد لحظة بتعدي و بانسى

مجرد فكرة تخطر لي في همسة

و باقي ذكرى من ايدك في لمسة

و حلم حلمته كنتي معايا فيه

صحيت مالحلم لكن لسه فاكره

و حب ما كانشي قلبي عمره ناكره

و كام غنوة شالتهالك دفاتره

بقالها قلب تاني تحس بيه

و قلبك انتي لأ 

ما كانشي يستحق 

و جاي دلوقتي رق 

ما عنديش عمر ليه

ما يبقاش حتى حق 

أسيب مخلص بحق 

و اديلك فيّه حق

تبقيلي انتِ إيه

مجرد لحظة بتعدي و بانسى

مجرد فكرة تخطر لي في همسة

و باقي ذكرى من ايدك في لمسة

و حلم حلمته كنتي معايا فيه

صحيت مالحلم لكن لسه فاكره

و حب ما كانشي قلبي عمره ناكره

و كام غنوة شالتهالك دفاتره

بقالها قلب تاني تحس بيه

بين الف جذب وشد

صبرت صبر يهد

ما لقيتش منك رد

إلا وغرورك فيه

جرح  الكرامة أشد

من طعن قلب بجد

حتى اذا كان باقي ود

ما بادوَّرش عليه

مجرد لحظة بتعدي و بانسى

مجرد فكرة تخطر لي في همسة

و باقي ذكرى من ايدك في لمسة

و حلم حلمته كنتي معايا فيه

صحيت مالحلم لكن لسه فاكره

و حب ما كانشي قلبي عمره ناكره

و كام غنوة شالتهالك دفاتره

بقالها قلب تاني تحس بيه

بتكره روحك

ياللي ندمت و نفسك

تدخل تاني القلب

ما انت خرجت بنفسك

و وراك خرج الحب

بإيديك كل جروحك

دا انت بتكره روحك

قولي ازاي هتحب

***

إنت عجيب ليه فْـ حُبَّك
فجأة بتبقى حنيِّن

أوِّل ما اعشَق قُرْبَك
عكس ده كلٍّه تبيِّن

مش عيشة.. ده جنون
احكي أو اشكي لغيري

و يكون مهما يكون
لِـهِنا كتَّر خيري

***

كنت معاك بالراحة

و انت بتجرح قلبي

بس خلاص بصراحة

ما بقتش أقدر أخبي

كل ما ازوِّد صبري

بتزود لي فْـ ظُلْمك

جبت فْـ حبَّك آخري

مش قادر أكون راحمَك