لإني لسة ما شفتكيش..
كل ما تمري في بالي..
هاعشقك حلم فْـ خيالي..
نفسي اشوفه يوم قبالي..
و فْـ حقيقته لحظة اعيش
***
هاعشق واهيم بعيون ضرير
ما شافتش يوم مَرّ الجداول
و رغم ده صوت الخرير
خلاها من شوقها تحاول
هالمح جمال ما شافوش بصير
واشتاق لنسمة جَتْ تِمايل
شعرك و اسابقها و اطير
و اسبق هواها للجدايل
***
و فْـ كل ليل هاكتب و ادوب
في حكاية بيني أنا و إنتِ
و اقراها قبل النوم يادوب
يمكن يزور طيفك مدينتي
تتلاقى في الحلم القلوب
و تكوني لحظتها حِـلِـمْـتِ
و ان تاه لُقانا في الدروب
يبقى الهوى زارك ما نِمْتِ
***
و ان جمَّعت بينا الظروف
و لقيت إيديَّة بين إيديكي
و اتحقق الحلم انِّي اشوف
قلبك.. هاعيش بيكي و ليكي
و ان كنتِ غير كل الوصوف
واللي انكتب مِــ القلب فيكي
هاحط (كاف) قبل الحروف
و كإني ما شفتش عينيكي
لإني لسة ما شفتكيش..
كل ما تمري في بالي..
هاعشقك حلم فْـ خيالي..
نفسي اشوفه يوم قبالي..
و فْـ حقيقته لحظة اعيش
إنهزامة قلب ...
ردحذفيحاول أن يظل نبض الحب فيه
وإن خذله الحبيب
مازال يهوى أن يظل في حالة حب
(هذا انطباع أول )
وقد يكون لي معها بقيه
خذلك الانطباع الأول
ردحذفبعد الحديث معها
ردحذفوجدت الخطأ في منظوري بالطبع
وأنها تتحدث عن النقيض تماما مما ظننت
وساعتها كانت الكاف قبل الحروف وأخذت أردد
(كأني لسه ما قريتكيش)
لا يوجد خطأ .. و ما قصدته بخذلان الانطباع الأول فقط إعادة القراءة لعل بين طيات الحروف معنى يخفى .. و قد وصل
ردحذف