الثلاثاء، 11 يناير 2011

بعد الفراق




تِعِبْتْ من كُتْر الرجوع بعد الفراق
تِعِبْتْ من قُولة (خلاص القلب فاق)

تِعِبْتْ من حُبِّك و من طبعك.. و من قلبي
يفضل يشيل في البعد لوم.. و كإنه مِتْعَبِّي

و يحِنّ من أول كلام فيه اشتياق

***

يا نعيش حقيقة حبنا.. يا ننتهي
و كفاية كان بينّا في يوم عشرة و هوى

يا إما هاكره.. و انتِ قبلي هتكرهي
كل لحظة جمَّعِتْنا يوم سوا

ما هو كل مرَّة بتوعدي
و بترجعي و بتبعدي

و تِعِبْتْ من كُتْر الرجوع بعد الفراق
...

***

الحب أجمل من كده.. و اسهل كتير
اللي فـْ خيالي .. اللي حلمت ادِّيه لحدّ

فيه اختلاف و خصام و عِنْد يبان كبير
و يبات حنان و مودة بين قلبين بِجَدّ

مش قلب يبعد يختفي
و يعود على مهله ان صفي

...
و تِعِبْتْ من كُتْر الرجوع بعد الفراق
تِعِبْتْ من قُولة (خلاص القلب فاق)

تِعِبْتْ من حُبِّك و من طبعك.. و من قلبي
يفضل يشيل في البعد لوم.. و كإنه مِتْعَبِّي

و يحِنّ من أول كلام فيه اشتياق



الخميس، 6 يناير 2011

لإني لسة ما شفتكيش





لإني لسة ما شفتكيش..
كل ما تمري في بالي..
هاعشقك حلم فْـ خيالي..
نفسي اشوفه يوم قبالي..
و فْـ حقيقته لحظة اعيش

***

هاعشق واهيم بعيون ضرير
ما شافتش يوم مَرّ الجداول
و رغم ده صوت الخرير
خلاها من شوقها تحاول

هالمح جمال ما شافوش بصير
واشتاق لنسمة جَتْ تِمايل
شعرك و اسابقها و اطير
و اسبق هواها للجدايل

***

و فْـ كل ليل هاكتب و ادوب
في حكاية بيني أنا و إنتِ
و اقراها قبل النوم يادوب
يمكن يزور طيفك مدينتي

تتلاقى في الحلم القلوب
و تكوني لحظتها حِـلِـمْـتِ
و ان تاه لُقانا في الدروب
يبقى الهوى زارك ما نِمْتِ

***

و ان جمَّعت بينا الظروف
و لقيت إيديَّة بين إيديكي
و اتحقق الحلم انِّي اشوف
قلبك.. هاعيش بيكي و ليكي

و ان كنتِ غير كل الوصوف
واللي انكتب مِــ القلب فيكي
هاحط (كاف) قبل الحروف
و كإني ما شفتش عينيكي


لإني لسة ما شفتكيش..
كل ما تمري في بالي..
هاعشقك حلم فْـ خيالي..
نفسي اشوفه يوم قبالي..
و فْـ حقيقته لحظة اعيش


الأحد، 2 يناير 2011

مسير الحي يتلاقى




تغيب عنا قلوب ياما..
نقول الدنيا سرّاقة
تاخدنا ألف دوامة.. 
و تفضل روحنا مشتاقة

لكن مهما يطول البعد
مادام فيه قلوب تصون الوعد
مسير الحي يتلاقى

بنتغيَّر مع الأيام.. 
و تتباعد مطارحنا
لكن يفضل لقا الأحلام.. 
يفكَّرنا بملامحنا

نشبِّه لو جمعنا طريق
نقرب إيد صديق لصديق
نلاقي قلوبنا سبَّاقة

ماهو مهما يطول البعد
مادام فيه قلوب تصون الوعد
مسير الحي يتلاقى

 بننسى وشوش بأساميها  
و أيامنا بتِشْغِلنا
و نتقابل ما نعرفها  
نبصِّلها تبصِّلنا

و ناس نتمنى نِصَادفها
و ناس عايشين مع طيفها
و ناس بالقلب تتلاقى

 ماهو مهما يطول البعد
مادام فيه قلوب تصون الوعد
مسير الحي يتلاقى

السبت، 1 يناير 2011

لسّه باخاف !




قد ما بينّا اختلاف
قد ما بانسى الخلاف
في دموع عينيكي

و قد قلبي عذاب ما شاف
قد ما لسّه باخاف
موت عليكي


ياللي مجنونة بعذابي
قلبي مجنون بيكي حسي

ليه أنا باداري فْـ عتابي
و انت بتزيدي و تقسي

و الهوى عني تحوشيه
حتّى و انت حاسّه بيه

و امّا اقولِّك .. ماشي.. عايزة حاجة ؟ .. قولي
تسكتي.. و الدموع يندهولي


و قد ما بينّا اختلاف
قد ما بانسى الخلاف
في دموع عينيكي

 قد قلبي عذاب ما شاف
قد ما لسّه باخاف
موت عليكي

عارفة لو ما اعرفش قلبك ؟
كنت سبتك من زمان

بس عارف إنّه غالبك
طفل له ساعة جنان

و أحلى ما فيكِ تعاندي
و انتِ عارفة الحق عندي

و امّا اقولِّك .. ماشي.. عايزة حاجة ؟ .. قولي
تسكتي.. و الدموع يندهولي


و قد ما بينّا اختلاف
قد ما بانسى الخلاف
في دموع عينيكي

 قد قلبي عذاب ما شاف
قد ما لسّه باخاف
موت عليكي