وأد الضمير

الكدب مش أسوأ خصال الناس 

في ساعات بيتبرَّر بلحظة خوف 

و الرحمة تسبق عند باب العدل 

أسوأ كتير العُهْر بالإحساس 

وأد الضمير تحت أي ظروف 

يسوى و يفوق في ذنبه جُرْم القتل 

أوهام

عودت نفسي ما اصدقهاش 

عشان ما يبقاش بينّا كلام

بتقول حاجات و ما تعملهاش 

و حِجَجْها صعبة قوي الأحلام

حرّمتها رغي الحكايات 

علمتها تِتْعان بِسُكات 

سلٌمتها كل البدايات

اللي اتْنَوِت و ما تمّتْهاش 

جايز تفوق بقى مالأوهام

ما عنديش كلام

ما عنديش كلام 

و كل الكلام بيترجَّى فيَّ أقولك كلام 

وحشتِ الكلام 

و انا لسه قادر أعافر في قلبي و اشدّ اللجام 

حزينة أكيد ! 

و حزني يفوق السكات  في البكا و الصراخ في العَديد 

و عارف أكيد.. 

معنى سبق الترصد و إصراري أقتل حبي الوحيد 

لكن ده اللي كان.. 

و اللي لازم يكون 

يموت الغنا..  

البسيط الحنون

و اصحي الضمير  

اللي بيه مستجير 

ماهوش عاشق اللي بعشقه يخون

ما عنديش كلام 

سكت كل كوني في لحظة سكوني لوأد الغرام 

و راضي الختام 

و راضي المشيئة ما هي دي الحقيقة برغم الآلام 

ما متش جديد

عشان متّ مرة زمان لما كان موتي يفيد 

لكنك بعيد

و مهما هاقرَّب.. لا عمري هاكونلك .. و لا اصبح شهيد

ماهو ده اللي كان.. 

و اللي لازم يكون 

يموت الغنا..  

البسيط الحنون

و اصحّي الضمير  

اللي بيه مستجير 

ماهوش عاشق اللي بعشقه يخون

خليني جنبك

ما تخلِّيك جنبي

و خليني جنبك

و لا قُرْبِنا ذنبي

و لا بُعْدِنا ذنبك

علشان لما نحتاج بعضنا

نلقى حد يهمُّه أمرِنا

يسمع منِّنا

يحفظ سرِّنا

ميـن يحفظ أكتر

من قلبي و قلبك ؟

***

قد ما رحنا من بعض كتير 

قد ما نرجع أقرب اكتر

و كإن اللي ما بينَّا ده مصير

نستغربه لو فيه هنفكَّر

بنقول على كل فراق ده أخير

و اتاريه برجوعنا متقدَّر

...

علشان لما نحتاج بعضنا

نلقى حد يهمُّه أمرِنا

يسمع منِّنا

يحفظ سرِّنا

ميـن يحفظ أكتر

من قلبي و قلبك ؟

*‫**‬

لو نتحاسب نلقى اختلافات

ما تْجَمَّعْشي قلبيـن ثانية

لكِن الواضح من كل ما فات

اللي بيجْمَعنا حاجات تانية

أرواح رغم بعادالمسافات

عايشة في دنيا غير الدنيا

...

علشان لما نحتاج بعضنا

نلقى حد يهمُّه أمرِنا

يسمع منِّنا

يحفظ سرِّنا

ميـن يحفظ أكتر

من قلبي و قلبك ؟

...

...

ما تخلِّيك جنبي

و خليني جنبك

الماسات المذْهِلَة

كنا اتفقنا عالدعا بالغيب لبعض  

كنا اتفقنا عالوفا لو خدنا بعد 

بس القلوب صاينة الوعود قليِّلة 

نادرة كما حر الماسات المذْهِلَة 

و قلبي كان عاشق و في العشق ابْتِلا 

و صبح بلا عشقه و لا مشتاق لنبض

***

رب القلوب يهدي القلوب و يهدَّها 

أعلم بما قبل النوايا و بعدها 

ما الكل مظلوم مين يقول على نفسه ظالم 

و الكل له حق و بيدعي رب عالم 

تخلص دموع الناس و يفضل عِنْدَها

***

و انا دمعتي على غلطتي فـ حقي أنا 

مجروح و جارح .. غربتي.. جوَّه هنا 

لا يفيد حساب لا يفيد عتاب لا يفيد عشم
كتر الدوا ما بيداويش كتر الألم

و الوقت بيلم الجراح من عمرنا

‎حاسب نفسك

‎حاسب نفسك.. 

مهما الناس انشغلوا بأمرك 

‎أدرى بنفسك.. 

عمر الناس ما تحس بجمرك 

‎اقفل بابك.. 

احبس روحك.. 

اصرخ فيها 

‎خلي عذابك.. 

يكوي جروحك.. 

مش يداريها 

‎و انت بنفسك.. 

ضفرك عمره ما يجرح ضهرك


اللي هيفتكرك خلِّيه.. صاحب و صديق
قلب الناس نادر تلاقيه.. مش قاصد شيء

شيل بإيديك.. ما تشيِّلهوش
و اللي هينساك ما تحاسبوش

‎اقفل بابك.. 

احبس روحك.. 

اصرخ فيها 

‎خلي عذابك.. 

يكوي جروحك.. 

مش يداريها 

‎و انت بنفسك.. 

ضفرك عمره ما يجرح ضهرك

و اللي نسيك.. لو يوم احتاجك.. روحله و شوف
جايز و انت ما بين أمواجك.. كان مكتوف

اوعى تلومه في أي ردود
و لا تستنَّي جميل مردود

‎اقفل بابك.. 

احبس روحك.. 

اصرخ فيها 

‎خلي عذابك.. 

يكوي جروحك.. 

مش يداريها 

‎و انت بنفسك.. 

ضفرك عمره ما يجرح ضهرك 

‎حاسب نفسك.. 

مهما الناس انشغلوا بأمرك 

أغاني مسروقة

الناس حكاياتها بقت متعادة و محروقة 

و كإنه مسلسل .. 

مطّ .. و حوارات ملزوقة 

اللي يحب استنّى فراقه 

و اللي يغيبوا تاني يشتاقوا 

استعباط و الناس فيه ساقوا 

نص الهوى كدب .. 

و نصه أغاني .. و مسروقة

اللقا بمعاد

الحروف بتقولي 

إنها كانت بايتة عالشفايف 

تتقري و تتعاد 

الحروف بتقولي 

قلبها لسه بيهوى.. بس خايف 

حتى و احنا بعاد 

و بتغضب مليون مرَّة
و بتضحك مرات تانية

و بتبكي جوه و بره 

و بتسرح ساعة و التانية 

بتقولي كلام اكتر بكتير..  ما باقولهوشي 

حتى الحلم اللي حِـلٰمِتُه بيَّ .. ما حكتوشي 

الحروف بتقولي
سيبها لو حاببها .. ما انت عارف 

اللقا بمعاد

ضعف إنساني

كل ما تغيب الحياة عنَّك 

كل ما تحس القلوب باردة 

كل ما تفلت دموع منَّك 

أو بس تلقى ضحتك شاردة

هتفتكرني 

و هتفتكر كل الكلام تاني 

و هتوحشك أغانِيَّه  و حناني 

طبع القلوب في الوحشة تلقاها 

فاكرة اللي حب بضعف إنساني 

كل ما يعدِّي القمر مكسور

من طول ليالي و هو مش جنبك

كل ما تاخدك خيوط النور

و الفجر بيشقشق على قلبك

هتفتكرني

و هتفتكر كل الكلام تاني 

و هيوحشك سَهَرْنا و جناني 

طبع القلوب في الوحشة تلقاها 

فاكرة اللي حب بضعف إنساني 

كل ما تحضن إيديك روحها

و تداري لهفة شوقها للمسة

كل ما تشتاقلي سامحها

فيها اللي فيها هي مش ناقصة

بتفتكرني

و هتفتكر كل الكلام تاني 

و هيوحشك إحساسي بيك تاني 

طبع القلوب في الوحشة تلقاها 

فاكرة اللي حب بضعف إنساني 

معجزة

انفلت خيطي الأخير 

و السبب يمكن بسيط 

بس قبله خيوط كتير 

كل خيط كان بعده خيط 

ما اختلفشي خيط عن التاني فْـ مصيره

بس آخر خيط ما كانشي بعده غيرُه

و رجوعه تاني.. معجزة..

إلا إذا..

رجَّعنا عصر المعجزات

***

اللي انكسر أصبح فتات 

مرِّت عليه الريح و طار 

و الباقي منه ذكريات 

زي الرماد من بعد نار 

زي الساعات لما تفوت بيها الثواني

زي اللي مات.. عايزينه يرجع لينا تاني

و رجوعه تاني.. معجزة..

إلا إذا..

رجَّعنا عصر المعجزات

***

الألم في القلب ساكن 

حتَّى لمَّا تطيب جراح 

و النَّدم لازم.. و لكن 

للي جاي.. مش اللي راح 

و السكات في لحظة أقوى مالدموع

لما شيء منا يضيع مالهوش رجوع

و رجوعه تاني.. معجزة..

إلا إذا..

رجَّعنا عصر المعجزات

ماهوش مرغوب

حِسَّك إنَّك ..
شخص ماهوش مرغوب في وجوده ..
ما بيغلطش
فما تغلطش و تعنِد فيك..
لإن مافيكش كرامة تكفّي..
تكون مرفوض و ما تفهمش
و ما تقبلش ضمير متأنِّب ..
أو مستغرب ..
ينكر ـ طبعا ـ  قوي .. و يرحَّب بيك من تاني
اللي بيقتل أكتر لما الخنجر يطلع مالمطعون
فما تسألش
صدَّق نفسك..
حِسَّك إنَّك ..
شخص ماهوش مرغوب في وجوده..
و ما تفضلش

الحلم

الحلم لما تشوفه قدامك حقيقة..

مخيف !

الحلم..  مش لحظة وصول 

الحلم..  عمر بتجري منه وراه 

و بتكتشف آخر المطاف..

الدايرة..

و التصاريف 

مجرد لحظة

مجرد لحظة بتعدي و بانسى

مجرد فكرة تخطر لي في همسة

و باقي ذكرى من ايدك في لمسة

و حلم حلمته كنتي معايا فيه

صحيت مالحلم لكن لسه فاكره

و حب ما كانشي قلبي عمره ناكره

و كام غنوة شالتهالك دفاتره

بقالها قلب تاني تحس بيه

و قلبك انتي لأ 

ما كانشي يستحق 

و جاي دلوقتي رق 

ما عنديش عمر ليه

ما يبقاش حتى حق 

أسيب مخلص بحق 

و اديلك فيّه حق

تبقيلي انتِ إيه

مجرد لحظة بتعدي و بانسى

مجرد فكرة تخطر لي في همسة

و باقي ذكرى من ايدك في لمسة

و حلم حلمته كنتي معايا فيه

صحيت مالحلم لكن لسه فاكره

و حب ما كانشي قلبي عمره ناكره

و كام غنوة شالتهالك دفاتره

بقالها قلب تاني تحس بيه

بين الف جذب وشد

صبرت صبر يهد

ما لقيتش منك رد

إلا وغرورك فيه

جرح  الكرامة أشد

من طعن قلب بجد

حتى اذا كان باقي ود

ما بادوَّرش عليه

مجرد لحظة بتعدي و بانسى

مجرد فكرة تخطر لي في همسة

و باقي ذكرى من ايدك في لمسة

و حلم حلمته كنتي معايا فيه

صحيت مالحلم لكن لسه فاكره

و حب ما كانشي قلبي عمره ناكره

و كام غنوة شالتهالك دفاتره

بقالها قلب تاني تحس بيه

بتكره روحك

ياللي ندمت و نفسك

تدخل تاني القلب

ما انت خرجت بنفسك

و وراك خرج الحب

بإيديك كل جروحك

دا انت بتكره روحك

قولي ازاي هتحب

***

إنت عجيب ليه فْـ حُبَّك
فجأة بتبقى حنيِّن

أوِّل ما اعشَق قُرْبَك
عكس ده كلٍّه تبيِّن

مش عيشة.. ده جنون
احكي أو اشكي لغيري

و يكون مهما يكون
لِـهِنا كتَّر خيري

***

كنت معاك بالراحة

و انت بتجرح قلبي

بس خلاص بصراحة

ما بقتش أقدر أخبي

كل ما ازوِّد صبري

بتزود لي فْـ ظُلْمك

جبت فْـ حبَّك آخري

مش قادر أكون راحمَك

أنا مش فاهمك

أنا مش فاهمك

ولا حبَّاني

ولا كارهاني

يبقى بتلعبي بيّ و بيكي

أنا مش ظالمك

و لا عايزاني

ولا سايباني

علشان إيه أفضل ليكي

عايزه تاخدي شوق و حنين

قلبي يحبِّك .. ما تحبيش ؟!

قلبك راضي ! هاخدع مين ؟

هاخدع قلبي ! ما بتحسيش ؟!

***

عايزه حبيب لكن بعدين

لسه ما جاش وقته و لياليه

يبقى قريب قدام العين

ليضيع منِّك تبكي عليه

عايزه حبيب وقت ما تحتاجي

يبقى ساعتها أفكّر آجي

***

عايزة حبيب جنبك يتشاف

و مالوهشي في القلب وجود

قلب رقيق عليكي يخاف

من غير ولا أشواق و وعود

عايزة عاشق من غير غيرة !

أنا مش حارس قصر أميرة

سيبه لنفسه

سيبه لنفسه

سيبه لروحه

ما تخافشي أيامه يروحوا

جايز راجع قلبه لقاك

مش فارس حلمه اللي مواعده

جايز راجع.. بس هواك

مش قادر يستحمل بعده !

عايز تستنّاه ؟ استنّاه

عايز تنسى ؟ خلاص انساه

بس حرام عالقلب جروحه

***

لما يكون دلوقت بيضحك

و انت بتبكي عليه و عليك !

و لا هيجيبه الدمع لعَندَك

و لا هيريَّح هم ماليك

هو فْـ حاله.. و انت فْـ حالك

ولاّ عذابَك بقى يحلالك ؟

***

بطَّل ليلة تفكَّر قلبك

ما بيسألشي يبقى نسيك

حتى اذا كان شاري و بيحبَّك

مش هيحب الضعف ده فيك

ألف بداله.. و ألف بدالك

نفسك هي اللي هتبقالك

...

...

جايز راجع قلبه لقاك

مش فارس حلمه اللي مواعده

جايز راجع.. بس هواك

مش قادر يستحمل بعده !

عايز تستنّاه ؟ استنّاه

عايز تنسى ؟ خلاص انساه

بس حرام عالقلب جروحه

سيبه لنفسه

سيبه لروحه

لو آخِر قلب

انتي مش محتاجاني

ولا عايزه قلب تاني

عايزه الدنيا فْـ إيديكي

ولا حتى سماها فوقِك

عايزه قدّام عينيكي

قلوب عذِّبها شوقك

هو انتي بس تاخدي ؟

و الناس مخلوقة تّدّي ؟

مش جاية عايزة ردّي ؟

أديني أهو باجاوبِك

لو آخر قلب قلبك

و حياتك مش هاحبك

عايزه تبقي انتي جارحة ؟

و كل الناس مسامحة ؟

من أول كلمة ليكي

فراش يجري لنورك

و كلمة حق فيكي

ما يقبلهاش غرورك

هو انتي بس تاخدي ؟

و الناس مخلوقة تّدّي ؟

مش جاية عايزة ردّي ؟

أديني أهو باجاوبِك

لو آخر قلب قلبك

و حياتك مش هاحبك

قبل ما امشي

قبل ما امشي أحب اقولك 

إني كداب.. لما قلت : 

ماليش أماني فيكي 

و لا محتاج لشيء 

 لسه باحلم بيكي  

نتشارك طريق 

و أما قلت انه انتهى 

لا ما انتهاش 

 و أما قلت اني  ما اكونشي.. 

ما قلتهاش ! 

قالها فيَّ حد تاني.. 

حد جوايا انكسر..
من تقل أحمالي و زماني

حد عاقل.. 

بس أنا عاشق جناني 

قبل ما امشي.. 

ما فيش في عيني 

غير بقيت نورك و ضلك 

غير.. بقيت الحلم 

و الليل اللي  فاضلي و فاضلك

مافيش في إيدي غير انّي اقولك

 بحبك

بحبك

...

حدوتة قبل النوم

حبَّها.. بنت بضفاير 

ليل.. و خيوطه حراير 

حبَّها.. و القلب طاهر 

و السَّما بلون الضماير

يومها كان قلبُه الصغيَّر

مالفرَح سابح و طاير

***

حلموا ويَّا الفجر يلقوا..

وردة تِفتح لمّا يسْقوا 

حلموا بالليلة اللي يبقوا 

عصفويرن غنّوا و عشقوا

كِتْرت الأحلام معاهم

و الي زاد الحلم صدقُه

***

كِبروا بالحب اللي بايِن

زي أزهار الجناين

عاشوا ويّا الحب لكن

فرَّقِت بينهم مداين

و امَّا ييجي زمنا يقسى 

يقسى عالقلب اللي صاين 

***

غابت الشمس اللي بانِت

و النَّهار بقى لونه باهِت

سابِت الأرض اللي كانتِ

عايشة بالعشق اللي نابِت

و القلوب لساها نابضة

عمرها في يوم ما ماتت

اطَّمِّني

اطمني..

قلبي خلاص عشق السُّكات..
ما عادشِ قادر ينتِفِضْ

حتي ان نبَض..

و اشتاق للحظة ماللي فات..

شوقه في لحظة بيترِفِضْ

اطِّمني

***

لو جمَّعِت بينَّا الظروف
هدَّارى عنِّك ما تخافيش

اسمِك بَهَت وِسْط الحروف
و لساني واعده ما نلتقيش

و لو العينين.. لاقت ما بين.. شوق القلوب
مدِّت إيدين.. فيها الحنين.. رافض يتوب..

رغم اني هارفض أجرحك
هانساكي لحظة ما المحك
اطِّمني

***

الجرح فوق جرحي القديم 

صحَّاه..  و انا موِّتْنِي تاني 

جرحين.. و منِّك.. شيء أليم 

و المرِّتين.. قلبي اللي جاني !

قلبي السَّفيه..  كان لسَّه فيه..  عِنْد فْ قَدرْ

بيحب ليه ؟.. كان فيكي إيه.. غير البشر ؟!

 خاف موت عليكي .. من زمان

و اهو خد جزاه .. أسى و هوان
اطَّمِّني

‫بتدوَّر في الوشوش

‫بتدوَّر في الوشوش‬ 

‫عن وش ما شفتهوش 

‬

‫و جايز لو قابلته ..‬ 

‫حتى ما تعرفوش‬ 

‫و تحس بليل و قسوة.. ‬

‫و غربة في العيون‬ 

‫و انك على بعد خطوة‬ 

‫أو أقل من الجنون‬ 

‫لا عرفت معاه تحبُّه‬ 

‫و لا بعدُه ما حبِّتوش‬ 

‫***‬

‫بتدوَّر في الوشوش‬ 

‫عن صوت جاي من بعيد‬ 

‫جايز عندك له صورة‬ 

‫تشبهله.. مش بعيد‬ 

‫لكن الصور ملامح ‬ 

‫بتكبر في الخيال‬ 

‫لحد ما تبقى ناس‬ 

‫و كلامها يبقى جارح‬ 

‫لما تغيب في السؤال‬ 

‫اللي مالوش أساس‬ 

‫و هتزعل مالحقيقة‬ 

‫اللي هتيجي أكيد‬ 

‫***‬

‫بتدور في الوشوش..‬ 

‫ملهوفة عليه عينيك‬ 

‫فاكر لما تشوفه ‬ 

‫هيرد الروح إليك‬ 

‫مهما تتمنى قُرْبه‬ 

‫مش هوَّ الي انت عايزه‬ 

‫نهارك بعد ليل‬ 

‫من طول الليل و غُلْبُه‬ 

‫قلبك بيداري عَجْزُه‬ 

‫في الوهم المستحيل‬ 

‫دوَّر على حدّ غيره‬ 

‫دوَّر جوّاك عليك‬ 

مرايتك

بتبص على إيه ؟  

ورد على ياسمين معطَّر 

هو انت ناقص يا قمر تحلو أكتر ؟ 

خاف من عيون الناس..  و سيبك من عينيَّه 

عيني عليك باردة.. دانا يتخاف عليَّه 

في كل نظرة ليك باقول الله أكبر 

***

خليك كده ما خلاص أنا مغلوب 

و الغلب يبقى حلال على الراضيين 

مستني إيه تاني يكون مرغوب ؟ 

ارحم مرايتك.. و ارحم الباصّين 

بتحط إيه ؟ و لون ده إيه المطلوب ؟ 

طبع الكسوف أحلى من التلوين

والله ما فارق في الجمال ده أحمر و أخضر 

***

الحب بيحَلِّي.. و بيقوِّي القلوب 

و يبان في ضحكة لامعة جوه العين 

بتنوَّر الوش .. اللي يلمحها يدوب 

نازلة بتتمايل على الخدين 

سحرك ملاني..  أسرْني.. أنا مجذوب 

هتسيبني فين ؟ و انا بعدك أنفع مين ؟ 

و الله ما عارف عالبعاد ازاي انا اقدر 

فكَّر على مهلك

فكَّر على مهلك 

مين غيري يستاهلك ؟

بحقيقي بيحبَّك ؟

أنا كنت باشتاقلك

دلوقتِ محتاجلَك 

و بأمرك أنا سايبك

و أما تعود تاني 

ساعتها نتحاسب 

و ان كنت تنساني

زمانّا هيحاسب 

و البعد ده ذنبك 

***

صدَّقني.. مش خايف ! 

هتعدَّي كام ليلة 

و تجيني مش عارف..

إيه غَيِّبَك ليلة ! 

مهما القلوب تهدى 

عالبعد مش واخدة 

روحك بتهواني 

و فْـ عشقها دايب 

***

عايزني أروح و ابعد ؟

حاضر.. على عيني !

هابعد .. كمان و اوعِد 

ما تجيش قصاد عيني 

ولا هاسألك (فيه إيه ؟)

و لا (بعدنا ده ليه ؟)

و اديني في مكاني 

مستنِّي يا غايب 

...

... 

و أما تعود تاني 

ساعتها نتحاسب 

و ان كنت تنساني

زمانّا هيحاسب 

و البعد ده ذنبك 

فكَّر على مهلك 

كان زمان

كان زمان.. 

قلب مستكتر حنان قلبي عليه  

كان زمان.. 

قلب متحيَّر يسيبني ازاي و ليه ؟ 

خفت اسيبه.. خفت يحزن 

مهما يعمل.. عمري ما ابدأ 

قلت هاصبر تاني أحسن

بكرة يفهم.. بكرة يعشق 

سابني هُوَّ...
و جرحه جُوَّه القلب عايش.. 

من زمان

***

لسه ما نسيتهوش.. و ما اعرفشي لإمتى
هي طيبة ؟.. و لا دي مهانة و عيبة

لما تبقى عينيَّ دايرة فْـ كل حتَّة
بس تتمنى تشوف عينيه قريبة

و ألقى عندي ألف عذر ما قالش منهم عذر
و أبقى مش فاكرله جرحه.. أو يهون الأمر

زي ما كنا زمان

***

جالي تاني.. بالأماني المستحيلة
إيه اللي جابه بعد ما ضيَّع زماني

قالي عايش وقته..  له دنيا جميلة
و اني عايش ماضي باوهم نفسي تاني

قلتله كل اللي باقي .. عشرة.. حبة ود
و اللي جوايا مداريه .. شيء يفوق الحد

زي ما كنا زمان

***

الكلام جاب كلام.. خد ساعات
و السؤال جاب سؤال.. مالهوش جواب !

كل ما يسأل سؤال ردُّه سُكات
اسمعه و المح في عينه ميت عذاب

قلتله عندي سؤال بس قول بالصِّدْق
قبل ما اسأل.. قال ما شافشي قد عشقي عشق

زي ما كنَّا زمان
...
...

و كان زمان..

قلب مستكتر حنان قلبي عليه  

كان زمان.. 

قلب متحيَّر يسيبني ازاي و ليه ؟ 

قلوب تانية

مش كل الأحلام تتحقق 

لكن الأيام بتعوَّض

بتقرَّب بعد ما بتفرَّق

و تفَرَّح.. مين يقدر يرفض 

و بننسى فْـ ضحك قلوب تانية 

أحزان ما غابتشِ ولاَ ثانية 

نكدِب على روحنا و بتْصَدَّق

***

الدنيا ماهيش جنة عشانّا

بتعاند فينا و نعاندها

على قد ما تقسى و تحزِنَّا

بندوَّر على ناس نسعِدها

...

و بننسى فْـ ضحك قلوب تانية 

أحزان ما غابتشِ ولاَ ثانية 

نكدِب على روحنا و بتْصَدَّق

***

الحلم ما هوش لازم يحصل

و هنحلم و هنفضل و نحلم

جايز لحاجات أجمل نوصل

بس أمَّا نشوف بعيون تفهم

...

و بننسى فْـ ضحك قلوب تانية 

أحزان ما غابتشِ ولاَ ثانية 

نكدِب على روحنا و بتْصَدَّق

الحُِروف

الجمال في الحرْف حُسْنِك

و الشَّجَن من باقي حُزْنِك

و الغُنا لعصفور في غُصْنِك

علِّمُه قلبِك غُناه

و الجِميل في القلب باقي

للجَميل اللي اشتياقي

لُهْ ما غيَّرهوش فراقي

لسه باتنسِّم هواه

الساعات بعدِك بطيئة

و الوشوش باردة بطريقة

و الحروف أوفى صديقة

بتواسيني في الحياه

و اما باسهر ليل بطوله

مش لاقيلِك حرف اطوله

أفتكر كلامنا اقولُه

يرجع الشعر اللي تاه

مشاعرِك

ضفَّري مشاعرِك في حضني 

و فرَّحيني مرة بيها 

و اغسلي همومك في حزني 

دوِّبيني و دوِّبيها 

فضفضي بكل اللي جوه

قلبي قلبك هوَّه هوَّه

ده اللي بعد الغيبة جابني

إني حاسس باللي فيها

***

احكي أحلامك قوليلي

شايفة بكرة إيه و فيـن ؟

و يا ترى تاني تناديلي ؟

ولاّ تبعدنا السنيـن ؟

واللي كان.. حلم انتهى ؟

ولا لُه باقي.. و لِها ؟

***

احكي عن حبك قوليلي

هو ده اللي حلمتي بيه ؟

و لاّ غيره ؟.. اوصفيلي

إيه اللي كنتي عايزاه فيه ؟

ليه قريبة دموع عينيكي ؟

نفسي أقرَّب.. أحتويكي !

...

...

فضفضي بكل اللي جوه

قلبي قلبك هوَّه هوَّه

ده اللي بعد الغيبة جابني

إني حاسس باللي فيها

...

ضفَّري مشاعرِك في حضني 

و فرَّحيني مرة بيها 

كسرة الإحساس

ما بانكسرشي قصاد عيون الناس 

لكن و أنا لوحدي بروحي بادوب 

ضي القمر في الليل صديق ونّاس 

باحكيله عالدنيا اللي بالمقلوب 

تاخدني حلم لحد سابع سما 

فيه الأمنيات حاضْرة بلا ملحمة 

و تعود بي تاني لأرضي و كأنَّما 

قاصدة المذلَّة و كسرة الإحساس

قلبي عاشق

قلبي عاشق مش جبان
بس علشانِك هاغيب

مهما اقرَّب مش هابان
مش هازودلك لهيب

قلبي كان باني سدُّه
و الطوفان جه يهدُّه
لسَّه واقف كلي ضدُّه
بمنتهى الشوق و الحنان

اللي واصل بينّا حاسُّه
بس قلبي بيِعْلَى حِسُّه
لما جرحُه هوى يمِسُّه
غنوته تِمْلَى المكان

قلبي عاشق مش جبان
بس علشانِك هاغيب

مهما اقرَّب مش هابان
مش هازودلك لهيب

اعتصامي خلاص بافُضُّه
بعد ما وصَّلت ردُّه
و اللي باقي فْـ قلبي وِدُّه
هاعيش عليه باقي الزمان

بس ما تحاسبيش جنوني
لما تشتاقلك عيوني
و اتخنِق من وِِسْْع كوني
و الْقَى رُوحِي في الميدان
...
...
قلبي عاشق مش جبان

حواديتَك

ما باملِّش من حواديتَك
ولا احس بوقت معاك

وان كنت زمان حبِّيتَك
ما عرفتش لسّه انساك

باسهر على دمعَك لِيلِي
و اسرح و انتَ بتحكيلي
موجوع و انتَ بتشكيلي

ما عْشِقْتَكْ و اترَجِّيتَك
سِبْت الـمُغْرَم بِهَوَاك

***

عيش الأيام بهدوء
ما هي كده كده.. اهي ماشية

غيَّر توب المخنوق
ما بتجيش بالعافية

اتعلَّم من قلبي
متعبِّي و بيخبِّي

ولا عمره نقص الشوق
عاشق نيِّته صافيه

***


اخترنا حياتنا خلاص
ولاّاختارت هيَّ

ما اتبدِّلشِ الإحساس
لو نِغْلَبْ مِدارِيَّه

و قلوبنا ياما فيها
حاجات بنخفيها

ما يشوفهاش غير الناس
اللامسة بحنِّيَّة

ما تزعلشي

ما تزعلشي..
و ما تلومشي..
ضميرك.. عاللي شفته في حلم
ماهوش راجع..
و مش هتشوفه ليل تاني
هتنساني..
أنا و الحلم

ما انا و انت..
و لا كنا و لا هنكون
ده شيء مجنون
ولا يعقل

و مهما يكون  بيلهمني غنا بإحساس
لكن زيك بيإلمني يا أغلى الناس

و بيك باستحمله لما بترتاحله
و باجي بقلبي وقت انت ما تسمحله

و احسّ بدمعتك عالبعد
و احسَّك و انت ناوي البعد

و اقولك.. لا ما تزعلشي..
و ما تلومشي..
ضميرك.. عاللي شفته في حلم
خلاص صدقني مش راجع
أنا هامشي !

حرّ في مشاعري

بحبَّك.. حرّ في مشاعري
أقولها في سري أو شعري

تكونلي.. ولاّ ما تكونشي
يبانلي هواك و ما يبانشي
خلاص عندي ما يفرقشي

خلاص أصله.. خِلِص عُمري

***

بحبَّك.. مش مصدَّقني ؟
و من إمتى انت حسِّتني ؟
ماهي دي حكايتي في هواك

أعيش العمر مستنِّي
تحس فْـ لحظة .. تفْهَمْني
يضيع العمر كلُّه معاك

***

بحبَّك.. لسة بكياني
كإني وقفت بزماني
لأول طلَّة بعنيك !

لكِن لا خدتني أحزاني
و لا خدني حبيب تاني
ولا عندي أمل فيك

...
...

بحبَّك.. حرّ في مشاعري
أقولها في سري أو شعري

تكونلي.. ولاّ ما تكونشي
يبانلي هواك و ما يبانشي
خلاص عندي ما يفرقشي

خلاص أصله.. خِلِص عُمري