اللي يموت مش لازم حدّ
علشان يبقى الموت ده بجدّ
مش موت بس بجسم و قلب
فيه موت حس و حلم و حب
و في ناس عايشة جوّه قلوب
و في ناس عايشة و ماشية يادوب
و في ناس قادرة تحيي قلوب
كلمة بتبني.. و كلمة تهدّ
***
عد سنين العمر تلاقي..
اللي اتعد كإنه ما كانشْ
يبقى تضيَّع ليه الباقي..
و لا تبكيه و لا تحزنشْ
طلَّع روحك من قمقمها
صحِّي أحلامك قوِّمها
و ان ما لقيتش.. اخلقها احلمها
تلقى الثانية بقت تتعدّ
***
اللي يصحِّي فينا جروحنا..
يبقى عايزنا ما نتقدِّمشْ
ما بيفرقش عن اللي جرحنا..
جه في عنينا تراب أو رمشْ
خليك زي الشمس في نورها
عمر ما دارت غيمة نهارها
مهما اتكاتروا.. تشق مسارها
خلِّي وجودك هوَّ الردّ
اللي يموت مش لازم حدّ
علشان يبقى الموت ده بجدّ
ليست هناك تعليقات:
إرسال تعليق