نفسي اشوفك

نفسي اشوفك
نفسي أحضن صوت شفايفك
و انت بتقولي بحبَّك
نفسي اكون دلوقت جنبك
إيد في إيد
عين في عين
قلب جوَّه القلب ينهي في لحظة خوفك
نفسي اشوفك


نفسي نرجع بالليالي للي فات
لما كان الحب لسَّه فْـ أوِّلُه
و القمر يسمع حكاوينا فْـ سُكات
و العصافير يصحوا بعد ما ليِّلوا
و امّا تهمس..
القمر نوره يضيع
و امّا تضحك..
يبقى كل الكون ربيع
ورده باين بين حروفك
نفسي اشوفك


نفسي اسأل نور حياتي (ليه بعيد ؟ )
بس خايف تجرحه كلمة فْـ عتابي
(إيه اللي شاغله عني.. سايبني وحيد
بين ظنون رايحة و جايَّة فوق عذابي ؟ )
و امَّا انام..
يبقى هوَّ الحلم كلُّه
جاي يقولِّي..
(طمِّن السهران و قولُّه
قد نِفسك.. نفسي اشوفك)
نفسي اشوفك