لما الألم يبقى معاك ضِلَّك
لما يضيق الصبر بنصيحة صديق
يبقى الندم مش عَلِّمَك.. ضَلَّـك
زي التراب و التِّبْر يِـفْـرِقْهُم حريق
إياك تِصَدَّق إن شيء ممكن يعود
بس اللي ضاع ممكن كتير فوقه يضيع
وايّاك تِحَقَّق حلم شامِت في الوعود
و الأصعب انّك لحظة تصعب عالجميع
إرمي ورا ضهرك تفاهات السنين
وسَّع طريقك.. بالدموع ما بيتمشيش
جايز اللي فات عمر مكتوبلك حزين
ماتخليهوش أكتر من المكتوب يعيش
إنسى اللي مَرّ.. المُـرّ بِيْعَلْقَمْ معاه
حلو اللي جاي.. و بُكرة أيام تيجي بيه
وايّاك تِخَوِّن باللي خان كل الحياة
لَيْخونك الإحساس في يوم احتجت ليه
لما الألم يبقى معاك ضِلَّك
لما يضيق الصبر بنصيحة صديق
يبقى الندم مش عَلِّمَك.. ضَلَّـك
زي التراب و التِّبْر يِـفْـرِقْهُم حريق
ليست هناك تعليقات:
إرسال تعليق