شكل القلوب في الرسم واحد
و مكانها جوه الجسم واحد
و بتختلف بين ألف واحد
و بيختلف بيها البشر
بين قلب صان اللي مواعد
و قلب خان العشرة جاحد
و قلب عاصي و قلب عابد
و قلوب دهب و قلوب حجر
***
و قلوب سوادها ألف كحل و ليل
كارهة الجميع من كرهها لروحها
و قلوب بياضها نور ملايكي جميل
تسعد قلوب لو حتى بجروحها
و قلوب تعيش العمر متعذِّبة
دايرة ورا أسئلة بلا أجوبة
تايهة و قصادها طريقها مش شايفاه
تعمى القلوب.. و يفيد بإيه البصر !
***
و قلوب تموت و وراها لعناتها
و لا فادها مال سايباه و لا عيالها
و قلوب تعيش للخلد بمماتها
سايبة وراها طيبة داعيالها
و قلوب تاخدها الدنيا و تجيبها
جارية ما بين مرضها و طبيبها
و لافيش دوا يشفيها.. غير لمّا
ترضى.. فيرضى عنها رب القدر
ليست هناك تعليقات:
إرسال تعليق