لما يحن الجرح للجارح

لما يحن الجرح للجارح..

لما اللي باع العمر يتسامح

و الخطوة تسبق روحها في المشية..

و هي رايحة للي يوم باعها

و الغدر يبقى كدب ناس واشية..

باعدت قلوب الحب جمَّعها

يبقى مافيش فايدة لكلام ناصح

لما انتصار الضعف باسم الحب يتدارى..

و الروح تسيب الجنة تمشي لنارها مختارة

لما يهون الذل..

يبقى الرجوع الحل..

و الضلمة زي الضل

و بكره جاي باللي جرى امبارح

..... لما يحن الجرح للجارح

لما احتياج القلب يبقى كلمة متعادة..

و اللي بيتعوِّد.. بيتنازل و يتمادى

لما بيرخى الشد..

يبدأ نزول العد..

لحد آخر حد

و اللي يسيب فرسه يلاقيه جامح

.... لما يحن الجرح للجارح