حبّيتك مرتين
مرة أول ما شفتك.. و فتنوني العينين
ما ارضيتش أقول (بحبِّك).. واكون مالمعجبين
و المرة التانية لما.. وسط الناس اتقابلنا
و الليلة لسة بادية،، و مسافة كتير ما بينّا
و كل ما تيجي عيني.. في عنيكي آلاقيكي باصّة
مش عارف صدفة.. و لاّ.. عالبعد بيَّ حاسّة
لكن فيه حد جنبك.. باينة في عنيه حاجات
حيَّرني زيادة قربِك.. منُّه طول الساعات
وامّا رحتِ معاه.. بعيد عن العيون
اتأكِّد لي هواه.. و ان هوايا جنون
باحب ازّاي و انا اللي.. مقابلك من يادوب
باحب ازّاي و إيه اللي .. يخلّيني ادوب
و لا كان بينّا كلمة.. ولا اتعرّفْنا حتّى
و إيه اللي ضايقني لمّا !.. حبّيتك بس إمتى !
مش فاهم إيه جرالي.. ياما عدّى قصادي
من إمتي كان ده حالي.. كاره ضعفي الليلادي
و فْـ وسط حسابي ليّه.. و مداري بإيدي وشّي
بصّيت من بين إيديّه.. ما لقيتكيش قلت هامشي
قمت امشي.. لكن رجعت.. مفاجأة سكتتني
ضحكتِ .. و انا ضحكت.. هواكِ خلاص سِكِنّي
مش عارف إيه اللي جابِك.. و لا مصدَّق وجودِك
معقول سبتيه و سابِك.. باسرَح ما بين ردودِك
و عدَّى الوقت بينا.. نحكي في ألف حاجة
ده غير اللي فْـ عيونّا.. ما فضلش فبها حاجة
لحد ما بان عليّ.. لما باسمك ناداكي
ماشية و بتقولي جايَّة.. عايزاني أستنَّاكي
بَِعَدْت عنيَّ عنِّك.. بافكر أمشي و انسى
فجأة حسّيت كإنِّك.. إيدك فوق كتفي لامسة
دوِّبْت الباقي منّي.. لحظة ما نويت اغيب
سألت (ده مين ؟) كإنّى.. مافيش غير حبيب
قلتيلي ده.. ده روحي ! .. الدنيا وِقْفِتْ بيَّ
و لألف مرَّة روحي.. صداها يِصْرُخْ فيَّ
صوتي عِلِي (يعني إيه؟!).. (ما تقولي.. اتكلِّمي)
قلتيلي (إيه.. فيه إيه!).. (أخويا.. توأمي!)
ما حسيتشِ و انا جنبك.. بالناس الموجودين
و انا باقولِّك بحبِّك.. و دموعي مالية العين
حبيتك مرتين
مرة أول ما شفتك.. و فتنوني العينين
و المرة التانية خفت.. لتضيعي مالإيدين !
100%%%%
ردحذفالله يا شاعر
ردحذفمن النوع اللي بحبه
حدوتة حلوة ..زي فاتت جمبنا كدة
محبتي الكبيرة اوي
لك عندي حدوتة تانية يا شيمي:)
ردحذف