بيوحشني الكلام منِّك
و يوحشني العناد فيكي
و احوش باقي الكلام عنِّك
و هتحسِّيه وصل ليكي
عشان القلب جُوّا القلب..
لأ جَنْبُه.. لأ برضُه
عشان القلب هُوّ القلب..
مهما اتفرَّقوا و بِعْدوا
عشان أول كلام منِّك
قاللي كل شيء فيكي
بيوحشني سكوتك..
قبل ما الضِّحكة تنوَّر خدِّك الوردي
و يوحشني سكوتك..
قبل ما الدَّمعة تقع و القاها فوق خدي
و كل ما فيكي له وَحشة
و زاده البُعْد ميت وَحْشة
بيوحشني وضوحك..
زي شمس نهار لا بتداري و لا تخبّي
و يوحشني وضوحك..
لمّا اشوف أسرار و اداري عنها عين قلبي
و كل ما فيكي له عندي
كلام بس ارجعي عندي
و يوحشني الكلام منِّك
و يوحشني العناد فيكي
و احوش باقي الكلام عنِّك
و هتحسِّيه وصل ليكي
ليست هناك تعليقات:
إرسال تعليق