في الحقيقة..
كنت باتمنَّاكي ليَّه
بس ما اتمنِّيتشِ قلبِك يوم يسيبُه
كنتِ أقرب واحدة من حلم فْـ عينيَّه
كنت باتمنَّى نصيب يشبه نصيبُه
و الشعور ده كان بيني و بيني
مين يحاسبني على أفكار تجيني
و انتهى اللي بينكو و مشاعري بريئة
***
كان في قلبي كلام كتير.. ما قلتهوش
كل واحد له في قلبه سر شايله
شفت في عنيكي اللي هُوَّ ما حسهوش
قلت عنُّه كلام ما كانشي عمرُه قايله !
قلتلك غرامي على إنُّه غرامه
و الكلام اللي ما بينكو قلتهوله
كنت حارس حبكو و باخُد سِهامُه
و السِّهام تبكي عليَّ الليل بطُولُه
***
و امَّا شُفْت فراقكو قرَّب.. خُفت منّي
قلبي للصحبة و للعشرة يخون
خفت ليكون السبب لحظة تمنّي
دعوة من ورا قلبي ما قصدتش تكون
أحلف انّي حاولت ما تكونش النهاية
أحلف اني حاولت أكتر منك انتِ
كنت باترجّاه كإن أنا الحكاية
و الحكاية إني عاشق .. عشقي انتِ
في الحقيقة..
كنت باتمنَّاكي ليَّه
ليست هناك تعليقات:
إرسال تعليق